Xəbərdarlıqları Tehranın Haniyənin qətlini ört-basdır etmək üçün istifadə etdiyi metod kimi dəyərləndirmək olar
İran və "Hizbullah" İsrailə hücumunu təxirə salıb. Bu barədə “Al Arabiyya” telekanalı ABŞ kəşfiyyatına istinadən məlumat yayıb. Qeyd olunub ki, Amerika Birləşmiş Ştatları hücumun qaçılmaz olduğuna əmindir. Baxmayaraq ki, onun mahiyyəti qeyri-müəyyən olaraq qalır. İran rəhbərliyi İsrailə mütləq cavab veriləcəyini bildirsə də, hələlik gözləmə mövqeyindədir. “Politico” qəzeti də bildirib ki, İran İsrailə qarşı kütləvi hücum qərarına yenidən baxa bilər. ABŞ administrasiyasının iki yüksəkrütbəli rəsmisi bildirib ki, Vaşinqton Tehrana irimiqyaslı zərbənin yalnız gərginliyi artıracağı və tərəflər arasında birbaşa qarşıdurma riski yaradacağı barədə xəbərdarlıq edib. Amerika həmçinin İranı Haniyənin ölümünə reaksiyasını yenidən nəzərdən keçirməyə və bunu daha geniş əməliyyatın bir hissəsi hesab etməməyə çağırıb. Livanın “Hizbullah” hərəkatı İranın niyyətindən asılı olmayaraq yaxın günlərdə İsraili vura bilər. Vurğulanıb ki, "Hizbullah" İsrailə hücum hazırlamaqda İrandan daha irəlidədir, ona görə də yaxın günlərdə hücum edə biləcək.
Türkiyəli professor, Qafqaz Strateji Araşdırmalar Mərkəzinin sədri Hasan Oktay İranın İsrailə "müharibə elan etməsini" əsası olmayan iddialar sayıb. Professorun sözlərinə görə, bunu İran dövlətinin İsmayıl Haniyənin qətlini ört-basdır etmək üçün istifadə etdiyi metod kimi dəyərləndirmək olar:
"Əgər HƏMAS lideri İsmayıl Haniyə raket hücumuna məruz qalıb və öldürülübsə, ilk ağla gələn sual İranın hava hücumundan müdafiə sisteminin niyə işə düşməməsidir? Ümumyyətlə, İranın hava hücumundan müdafiə sisteminin olub-olmamasıdır. Halbuki İsmayıl Haniyənin qonaq evi çox təhlükəsiz və qorunan yer sayılır. Buna rəğmən, xaricdən hücum olubsa, deməli, kəşfiyyat məlumatı göndərilib".
Ekspert vurğulayıb ki, İranın aprelin 13-də İsrailə hücumu nəticəsində ABŞ, Böyük Britaniya və bir çox Avropa dövlətləri İsrail ətrafında birləşərək İrana qarşı cəbhə qurublar: "Bunun ardınca İran öz bütövlüyünü qorumaq məqsədilə əvvəllər prezidentliyə namizəd olsa da, ruhani şura tərəfindən şans verilməyən Məsud Pezeşkianı mövcud sistemi xilas etmək üçün namizəd etdi və prezident seçdirdi. İbrahim Rəisinin öldürülməsinə cavab verə bilməyən İran Yaxın Şərqdə İsrailə qarşı qəyyumluq müharibəsi aparan "Hizbullah, "Həşti Şabi" və "Husilər"i qurban verdi. İran İsmayıl Haniyə vasitəsilə HƏMAS-ı İsrailə qurban verməklə dövlətinin bütövlüyünü və sistemin davamını təmin etdi. O baxımdan Yaxın Şərqdə İran-İsrail münaqişəsinin başlaması və genişlənməsi ehtimalı gündən-günə azalır".
