Trampın vəzifəyə başlaması fonunda Təl-Əviv Tehranı provokasiyaya çəkmək üçün əlindən gələni edəcək
İran dekabrın 28-dən etibarən ölkə ərazisində hərbi təlimlərə başlayıb. Müdafiə naziri, general-mayor Əziz Nəsirzadə deyib ki, düşmənin iddialarının əksinə olaraq, İranın müdafiə qabiliyyətinin azalmadığını, əksinə, gücləndiyini nümayiş etdirən bir sıra hərbi təlimlərə start verilib.
Politoloq Turan Rzayev "Sherg.az"a deyib ki, təlimlər Ə.Nəsirzadənin “düşmən” adlandırdığı İsrailə cavabdır. Ekspertin sözlərinə görə, Təl-Əviv son zamanlar Tehrana çox ciddi zərbələr vurub:
"Söhbət İran proksiləri olan “Hizbullah” və HƏMAS-dan gedir. Vəziyyət o həddə çatıb ki, proksilərlə Tehranın arası açılıb. Bundan başqa, Suriyada Əsəd rejiminin devrilməsi də Tehranın Yaxın Şərq dayaqlarından birini itirməsi deməkdir. İsrail son günlər Yəməndə husilərə aviazərbələr endirir. Quru əməliyyatlarından hələlik bəhs edilmir, lakin zərurət yaranacağı təqdirdə bu da istisna deyil".
T.Rzayevə görə, İsrail faktiki olaraq ABŞ Prezidenti Donald Trampın vəzifə səlahiyyətlərini icra etməyə başlamasını gözləyir: "Bu vaxta qədər isə İran proksilərini gücdən salmağa çalışır. Aydın məsələdir ki, Təl-Əvivin yekun hədəfi məhz İrandır. Trampın vəzifəyə başlaması fonunda Təl-Əviv də Tehranı provokasiyaya çəkmək üçün əlindən gələni edəcək. İran indiki məqamda İsraillə, həmçinin Təl-Əvivin yaratmaq istədiyi koalisiyaya qarşı müharibəyə hazır olduğunu göstərmək istəyir".
