“Görünən odur ki, Rusiya yerdə qalan məsələləri həll etmək istəmir. Belə gedişat isə maraqlarımıza cavab vermir”
“Əlimizdən gələni etməliyik ki, həm Laçın dəhlizinə nəzarəti bərpa olunsun, həm də Qarabağdakı separatçıları tərkisilah edək”
“Elə olsun ki, 4 ildən sonra bölgədə rusiyalı hərbçilərə ehtiyac qalmasın!”
Rusiya xarici işlər naziri Sergey Lavrov bildirib ki, Rusiyanın sülhməramlı qüvvələri regionda əldə olunmuş sabitliyin saxlanılmasına töhfəsini verir. Onun sözlərinə görə, hazırda bölgədə heç bir zorakılıq aktları yaşanmır:
“İlkin mərhələdə meydana gələn kiçik insidentlər həllini tez tapırdı. Bir daha vurğulamaq istəyirəm ki, hazırda orada vəziyyət sabitdir.
Qarabağda hərbi əməliyyatların tam dayandırılması haqqında ötən il Rusiya, Azərbaycan və Ermənistan arasına əldə olunmuş razılaşmaların əsas nəticəsi münaqişə zonasına sabitliyin əldə olunmasıdır”.
S.Lavrov həmçinin regiona işçigüzar səfərlərin bərpası ilə bağlı ATƏT-in Minsk qrupu həmsədrlərinin Nyu-Yorkda rəsmi Bakı və İrəvanla razılıq əldə etdiyini bildirib.
Mövzu barədə fikirlərini “Sherg.az”la bölüşən “Atlas” Araşdırmalar Məkrəzinin rəhbəri, politoloq Elxan Şahinoğlu Lavrovun açıqlamasında iki ziyanlı məqamın olduğunu diqqətə çatdırıb:
“Birincisi, Lavrov deyir ki, bölgədə 1 ildir sabitlik hökm sürür. Əlbəttə, müharibənin olmaması vacibdir, ancaq sabitlik o demək deyil ki, məsələlər tam həll olunub. Laçın dəhlizi və separatçıların ərazilərimizdən tərkisilah olunmaması ilə bağlı suallarımız var. Amma Lavrovun söylədiklərindən belə çıxır ki, bütün bunlar Rusiya üçün vacib deyil, təki atəş açılmasın. 30 ilə yaxın müddətdə başımızı belə aldatmağa çalışdılar, söylədilər ki, sabitlik olsun. İndi də eyni açıqlamalar verirlər.
İkinci ziyanlı fikir odur ki, Lavrov ATƏT-in fəaliyyətə başlaması ilə bağlı açıqlama verir. Halbuki dövlət başçısı “Anadolu” agentliyinə müsahibəsində bildirdi ki, onların bu cür fəaliyyəti bizim üçün faydalı deyil. Yəni gəlib nəyi müzakirə edəcəklər? Status məsələsi bizi maraqlandırmır!.
Görünən odur ki, Rusiya yerdə qalan məsələləri həll etmək istəmir. Belə gedişat isə maraqlarımıza cavab vermir. Ona görə də əlimizdən gələni etməliyik ki, həm Laçın dəhlizinə nəzarəti bərpa olunsun, həm də Qarabağdakı separatçıları tərkisilah edək. Elə olsun ki, 4 ildən sonra bölgədə rusiyalı hərbçilərə ehtiyac qalmasın!”.
Yeganə Bayramova
