İrəvan hökumətinin başçısı üçün ölkə ictimaiyyətinin rəyi hava-su kimi lazımdır
“Paşinyanı dəstəkləyən Qərb ictimai rəy üçün milyonlar xərcləyir və erməni ictimai rəyində anti-Rusiya ovqatını körükləyir. Bu, ciddi siyasi mübarizədir, informasiya savaşıdır”
"İrəvana Azərbaycanla heç bir müharibə qətiyyən lazım deyil". Bunu Ermənistan Baş naziri Nikol Paşinyan deyib. Baş nazir bildirib ki, istənilən təcrübəli müşahidəçi başa düşür ki, daxili siyasi mövqelərimizi gücləndirmək üçün əksinə, regionda sabitlik lazımdır". Paşinyan qeyd edib ki, regionda yeni eskalasiya üçün heç bir səbəb görmür. Baş nazir Bakı ilə sülh sazişi layihəsinin bəndlərinin 90 faizini razılaşdırdıqlarını da söyləyib. O, sülh müqaviləsinin imzalanması işlərinin sürətləndiriləcəyinə ümidini ifadə edib. Xatırladaq ki, Paşinyan bir neçə gün öncə müxalifətin Qarabağla bağlı ünvanladığı ittihamlara da cavab vermiş, "Dağlıq Qarabağ respublikası" adlı "dövlətin" olmadığını bir daha təkrarlamışdı. Növbəti dəfə siyasi qüvvələrə və ictimaiyyətə çağırış etmişdi ki, bu kimi məsələləri kənara qoyub, ölkənin maraqları naminə fəaliyyət göstərmək lazımdır.
Paşinyanın açıqlamalarını təhlil edən politoloq Natiq Miri "Sherg.az"a açıqlamasında deyib ki, Nikol Paşinyana qarşı daim irəli sürülən ittihamlardan biri Qarabağla, müharibə ilə bağlıdır və bunu baş nazirin xəyanəti ilə əlaqələndirirlər. Ekspert bənzər ittihamların hələ uzun müddət davam edəcəyini düşünür:
"Nikol Paşinyanın məğlub olduğu müharibəni başladan ifadə məhz "Qarabağ Ermənistandır" sözü idi. Revanşist qüvvələr Paşinyanın əleyhinə istifadə etmək üçün bu məsələni ara-sıra dövriyyəyə buraxırlar. Paşinyanın mütəmadi çıxışları, ittihamlara cavab verməsi ona qarşı ittihamları zamanla əritmək məqsədi güdür. Əks halda həm özünü təmizə çıxara bilməz, həm də ictimai rəyin lehinə dəyişə bilməz. O baxımdan Paşinyanın açıqlamaları həm də birbaşa ictimai rəyə hesablanıb. İrəvan hökumətinin başçısı üçün ölkə ictimaiyyətinin rəyi hava-su kimi lazımdır. Paşinyan anlayır ki, 2026-cı il parlament seçkilərində ictimai rəy əsas rol oynayacaq. Ona görə də Ermənistan ictimai rəy uğrunda ciddi mübarizə gedir".
Analitik vurğulayıb ki, bir tərəfdə revanşist müxalif qüvvələr və onların xidmət etdiyi Rusiya, digər yanda isə Nikol Paşinyan hökuməti və onları dəstəkləyən Qərb dünyası var:
"Paşinyanı dəstəkləyən Qərb ictimai rəy üçün milyonlar xərcləyir və erməni ictimai rəyində anti-Rusiya ovqatını körükləyir. Bu, ciddi siyasi mübarizədir, informasiya savaşıdır. O ki qaldı sülh sazişi mətninin böyük faizinin razılaşdırılması məsələsinə, Paşinyan bənzər ifadələri dəfələrlə səsləndirib. Sülh sazişinə mane olan məqamlar və Bakının tələbləri ortadadır".
