Əgər bələdiyyələrin səlahiyyətləri artırılsa, insanların bu seçkilərə marağı artacaq
2025-ci il yanvarın 29-da Azərbaycanda növbəti bələdiyyə seçkiləri keçiriləcək. Bu seçkilər ölkədə sayca altıncı ümumrespublika bələdiyyə seçkisi olacaq. Mərkəzi Seçki Komissiyasının sədri Məzahir Pənahov siyasi partiyalara bələdiyyə seçkilərində daha fəal iştirak etmələri üçün çağırış edib.
Xatırladaq ki, bələdiyyə seçkiləri hər 5 ildən bir keçirilir. Sonuncu seçkilər 2019-cu ildə təşkil olunub.
Azərbaycan Demokrat Partiyasının sədri Sərdar Cəlaloğlu "Sherg.az"a verdiyi açıqlamada bildirib ki, ADP də bələdiyyə seçkilərində iştirak edəcək:
"Hazırda Azərbaycanda bələdiyyələrin fəaliyyəti və səlahiyyətləri ilə bağlı müəyyən islahatların aparılması gözlənilir. Bu islahatlar çərçivəsində bələdiyyələrin rolu müəyyən qədər artırıla bilər ki, bu da onların daha geniş fəaliyyət imkanlarına malik olmasına şərait yaradacaq. Görünən odur ki, yaxın gələcəkdə bələdiyyələr və yerli idarəetmə sahəsində yeni yanaşmalar tətbiq olunacaq. Bizim də qarşıdan gələn bu seçkilərdə iştirak etmək fikrimiz var. Hesab edirəm ki, bu dəfə keçiriləcək bələdiyyə seçkiləri 2019-cu ildə baş tutan seçkilərdən fərqli olacaq. Bunun əsas səbəblərindən biri dünyada baş verən mürəkkəb iqtisadi və siyasi proseslərdir. Bu vəziyyət Azərbaycana da təsir edir və hər kəs artıq anlayır ki, ölkədə yeni təfəkkürün və idarəetmə yanaşmasının tətbiqi zəruridir".
Sərdar Cəlaloğlu əlavə edib ki, hazırda vətəndaşların bələdiyyə seçkilərinə marağı çox aşağı səviyyədədir:
"Bunun əsas səbəbi bələdiyyələrin səlahiyyətlərinin məhdud olmasıdır. Mövcud vəziyyətdə bələdiyyələr əhalinin qarşılaşdığı problemlərin həllində əhəmiyyətli rol oynaya bilmir. Əgər bələdiyyələrin səlahiyyətləri artırılsa və onlar müəyyən məsələlərin həllində real təsir gücünə sahib olsalar, insanların bu seçkilərə marağı artacaq".
