Sosial şəbəkələrdə azyaşlının xəsarətləri əks olunan görüntülər polis tərəfindən araşdırılıb.
Bu barədə APA-nın sorğusuna cavab olaraq DİN-in Mətbuat Xidmətinin baş inspektoru polis leytenantı Lumu İsrəfilli bildirib. Qeyd olunub ki, aidiyyəti dövlət qurumlarının əməkdaşları ilə birgə uşağın sığınacağa yerləşdirilməsi təmin olunub.
Polis əməkdaşları tərəfindən azyaşlıya zorakılıq göstərən anası saxlanılıb və barəsində Cinayət Məcəlləsinin əzab vermə maddəsilə cinayət işi başlanılıb.
Xəsarətlərin dərəcəsini müəyyən etmək məqsədilə müvafiq ekspertiza təyin olunub.
Araşdırma aparılır.
Psixoloq Samirə Bağırova “Sherg.az”a bildirib ki, evlənən insanların hamısı sağlam psixikaya sahib deyillər:
“Bir çox halda bunu valideynlər özləri bilsə də, əfsuslar olsun ki, “ ərə gedər düzələr, evlənər düzələr, bir uşaq dünyaya gətirər düzələr” düşüncəsi ilə sadəcə başlarından edirlər. Bu gün gənc anaların uşaqla məşqul olmağa səbri yetmir. Keçmiş qadının ən böyük nailiyyəti ərə getmək, uşaq dünyaya gətirmək idisə, bu günün qadını uşağa görə özünü inkişafdan qalmış kimi hiss edir, tükənmə sindromu yaşayır. Çünki valideynlər qız uşaqlarına gələcəyin anası, xanımı deyil, uğurlu iş qadını, varlı kişiyə ərə getmək kimi öz arzularını köçürüblər. Ən böyük tətikləyici dəstək isə seriallardan, sosial şəbəkələrdən gəlir. Qadının bu davranışına psixoloji pozuntu deyib keçmək vəziyyəti yüngülləşdirmək, məsuliyyəti üzərindən atmaqdır. Çünki “ psixologiyam yerində deyil “cümləsi də dəb halı alıb artıq. Hər kəs etdiyi əməlin cəzasını çəkməli, təhsil sistemi isə tamamilə dəyişməlidir. Nə qədər ki, məktəblərdə əvvəllər olduğu kimi əmək təlimi, idman təlimi, əxlaq, davranış təlimləri keçirilməyəcək, tək ailə tərbiyəsi ilə yetişənlər hələ çox əməllər törədəcəklər”.
