Ermənistan, Azərbaycan və Türkiyə arasında yeni uğur planı hazırdır
Zəngəzur dəhlizi ilə bağlı Azərbaycan, Türkiyə və Ermənistan arasında əldə edilmiş razılaşmanın məxfiliyi ləğv edilib. Bu iddia ilə "Hraparak" qəzeti çıxış edib. Erməni nəşrinə görə, Ermənistan Baş naziri Nikol Paşinyanın iyunun 20-də Türkiyəyə səfərində dəhlizin açılması məsələsi razılaşdırılıb: "Son günlər KİV-də həmin səfər zamanı əldə olunan razılaşma məxfilikdən çıxarılır. Məlumata görə, Ermənistan, Türkiyə və Azərbaycan Zəngəzur dəhlizi layihəsi üzrə razılığa gəlib ki, bu da regional geosiyasət və nəqliyyat şəbəkələrində ciddi dəyişikliyə səbəb ola bilər. İyulun 3-də ABŞ-nin planının da məxfiliyi ləğv edilib. Bu plana görə, dəhlizə nəzarət özəl ABŞ şirkətinə veriləcək. Həmçinin bu plana əsasən, Rusiya dəhlizə nəzarətdən kənarda qalacaq". "Hraparak" qeyd edib ki, ABŞ-nin planı anti-Rusiya xətti tutan Ermənistan hakimiyyətinin maraqlarına uyğundur.
Milli Cəbhə Partiyasının sədr müavini Tural İrfan Sherg.az-a deyib ki, Zəngəzur dəhlizi məsələsində həll yolları çoxdur. Lakin ekspert düşünür ki, əsas və ən uyğun variant qeyd olunan formadır:
"Məlumata görə, Zəngəzur dəhlizinin tranzit termini ilə əvəzlənməsi və Azərbaycandan Azərbaycana yolun açılmasının mümkünlüyü barədə razılıq var. Lakin bunun nə dərəcədə dəqiq olub-olmaması rəsmən bəyan olunmayıb. İran və Rusiyanın ölkəmizə qarşı müştərək təzyiqləri artırması bu razılaşmanın real olduğuna dəlalət edir. Bu kimi razılıqların əldə olunması, yaxud başqa variantların həll yolu kimi nəzərdən keçirilməsi və Türkiyədə görüşlərin olması təbiidir. Həm Azərbaycan, həm də Ermənistan müstəqil ölkədir və aralarında vasitəli, yaxud vasitəsiz anlaşma, razılaşma əldə etmək hüququna sahibdirlər. Buna Rusiya, İran və ya başqa ölkə müdaxilə edə bilməz. Çünki bu danışıqların, razılaşmaların məqsədi ölkələr arasında sülhün və regionda sabitliyin davamlı olmasına xidmət edir. Heç bir başqa ölkənin də təhlükəsizliyinə, maraqlarına qarşı deyil".
T.İrfan əlavə edib ki, İranın Ermənistandakı səfirinin Azərbaycana qarşı əsassız və təxribatçı ittihamlarının, İsrailin guya İranı vurarkən hava məkanımızdan istifadə etməsi iddiasının kökündə Ermənistanla əldə edilməkdə olan sülh anlaşması durur: "Rusiyanın soydaşlarımıza qarşı qanunsuz addımlar atması və Ermənistanda kilsəni hökumətin üstünə qaldırma cəhdləri də sözügedən anlaşmalara mane olmaq məqsədi daşıyır. Paşinyanın Türkiyə səfəri Rusiyanı narahat etdi. Zəngəzurla bağlı əsas maneə isə Ermənistandan deyil, İran və Rusiyadandır. Rusiya özünün iştirakı olmadan bu dəhlizin açılmasını istəmir, İran isə ümumiyyətlə əleyhinədir. Lakin Ermənistan qətiyyətli qərar verib bu müdaxilələri rədd edərək yekun rəyini ortaya qoyursa, şübhəsiz, burada nə İranın, nə də Rusiyanın etirazı önəm kəsb edər. Ələlxüsus, işin içində Türkiyə varsa, pozucu təsirlərin olması inandırıcı deyil. İstər gizli, istər açıq razılıq olsun, bu, ölkələrimizin haqqıdır və sülhə, inkişafa xidmət edir. Belə bir razılığın olması labüddür".
