Şagirdlər özləri tərəfindən həyata keçirilməli olan hesablama və məntiqi əməliyyatları etmirlər
Süni intellektdən və ya internet üzərindən hazır cavabların əldə edilməsi nəticəsində analitik düşünmə, hesablama qabiliyyəti və məntiqi təfəkkürün inkişafı ləngiyir
Cənubi Koreya Parlamenti 2026-cı ilin mart ayından etibarən tələbələrin sinif otaqlarında mobil telefon və rəqəmsal cihazlardan istifadəsini qadağan edən qanun layihəsini qəbul edib.
APA xəbər verir ki, bu addım gənclər arasında sosial media asılılığı ilə bağlı artan narahatlıqlar fonunda baş verib.
Ümummilli araşdırmalara görə, orta və lisey şagirdlərinin 37 faizi sosial medianın gündəlik həyatlarına təsir etdiyini, 22 faizi isə hesablarına daxil ola bilməyəndə narahatlıq keçirdiklərini deyir.
ABŞ-da yerləşən “Pew” araşdırma mərkəzinin məlumatına görə, Cənubi Koreya 99 faiz internetə nüfuzetmə dərəcəsi və 98 faiz smartfon sahibliyi ilə dünyanın ən rəqəmsal cəmiyyətlərindən biridir.
Ali təhsil məsələləri üzrə ekspert Vüsal Kərimli isə “Sherg.az”a bildirib ki, təkcə Cənubi Koreyada deyil, dünyanın bir çox inkişaf etmiş ölkələrində mobil telefonların məktəblərdə, xüsusən də sinif otaqlarında istifadəsi birmənalı şəkildə qadağan edilib:
“Azərbaycanda da bu məsələlər gündəmdədir. Mənim fikrimcə, mobil telefonların və digər elektron cihazların dərs prosesində şagirdlər tərəfindən istifadəsi yolverilməzdir. Belə ki, bu hal diqqətin yayınmasına, dərsə marağın və diqqət səviyyəsinin azalmasına səbəb olur. Şagirdlər özləri tərəfindən həyata keçirilməli olan hesablama və məntiqi əməliyyatları etmirlər. Süni intellektdən və ya internet üzərindən hazır cavabların əldə edilməsi nəticəsində analitik düşünmə, hesablama qabiliyyəti və məntiqi təfəkkürün inkişafı ləngiyir. Bu baxımdan belə bir qadağanın tətbiqi əslində mənfi deyil, müsbət nəticələr verə bilər. Onsuz da şagirdlər dərsdən kənar vaxtlarda mobil cihazlardan və telefonlardan sərbəst şəkildə istifadə etmək imkanına malikdirlər. Buna görə də dərs zamanı sinif otaqlarında şagirdlərin mobil telefonlardan və elektron cihazlardan istifadə etməsi yolverilməz hesab olunmalıdır”.
