“İtkilərimiz də çox olacaqdı. Kapitulyasiya müqaviləsi şərait yaratdı ki, üç rayonumuzu qan tökülmədən geri alaq”
“Bu, Ali Baş Komandan İlham Əliyevin uzaqgörən siyasəti nəticəsində mümkün oldu”
“Laçın rayonunun işğaldan azad olunması tarixi hadisədir. Özü də bir güllə atmadan biz Laçın rayonunu qaytardıq. Düşməni buna məcbur etdik”.
Bunu Azərbaycan Prezidenti İlham Əliyev bu gün xalqa müraciətində deyib. Dövlət başçısının sözlərinə görə, döyüş meydanında əldə edilmiş parlaq qələbə bu gözəl nəticəyə gətirib çıxardı ki, üç rayonumuz - Ağdam, Kəlbəcər və Laçın bizə qaytarıldı: “Biz bu rayonları bir güllə atmadan, bir şəhid vermədən qaytarmışıq”.
Deməli, Azərbaycan təkcə hərb meydanında yox, həm də siyasi sferada qalib gəldi və gücünü bütün dünyaya göstərdi.
Millət vəkili Tahir Kərimli əldə olunan nailliyyətə dair fikirlərini “Sherg.az”la bölüşüb:
“Beynəlxalq ekspertlərin sözləri də, müşahidələr də təsdiqləyirdi ki, ötən illər ərzində ən güclü istehkamlar məhz Kəlbəcərdə qurulmuşdu. Həmçinin Laçın da olduqca strateji yerdir.
Əlbəttə, biz həmin əraziləri döyüşərək azad edərdik. Amma itkilərimiz də çox olacaqdı. Kapitulyasiya müqaviləsi şərait yaratdı ki, üç rayonumuzu qan tökülmədən geri alaq. Əlbəttə, bu, ilk növbədə Prezident, Ali Baş Komandan İlham Əliyevin uzaqgörən siyasəti nəticəsində mümkün oldu.
Dövlət başçısı xalqa müraciətində bizim hansı təzyiqlərin qarşısını aldığımızdan danışdı. Beləliklə, əsas şərtimiz yerinə yetirildi- torpaqlarımız qaytarıldı. Prezidentin dediyi kimi, biz bir sıra layihələri indi birbaşa Rusiya ilə müzakirə edirik.
Çünki Ermənistanın özünün də bir dövlət olaraq varlığı sual altındadır. Yəni biz həm hərbi, həm də diplomatik qələbə qazandıq. Qazax və Naxçıvanın işğal altındakı kəndlərinin də geri qaytarılmasını arzulayırıq.
Amma, demək olar, Qarabağ artıq tamamilə bizimdir. Bu, çox sevindiricidir”.
