Azərbaycandan Türkiyəyə yardım aksiyası böyük bir hərəkata çevrildi
"Azərbaycan-Türkiyə dostluğu, qardaşlığı əbədi və sarsılmazdır". Bunu millət vəkili Ceyhun Məmmədov deyib. Deputat bildirib ki, iki dost və qardaş ölkə Azərbaycanla Türkiyə tarixin bütün dövrlərində sevincli və kədərli günlərdə bir-birinin yanında olublar: "Türkiyədə baş vermiş güclü zəlzələ nəticəsində çoxsaylı insan tələfatının və yaralıların olması Azərbaycan xalqını da dərindən kədərləndirdi.
Ölkəmiz qardaş Türkiyənin dərdinə şərik çıxdı. Sadə vətəndaşdan tutmuş, dövlət və özəl qurumlara qədər hər kəs Türkiyəyə dəstək olmağa çalışdı. Yardımlar ilk gündən Bakı şəhəri, Babək prospektində toplanmağa başladı. Sonra daha böyük məkanda, Bakı İdman Sarayında yardım kampaniyası davam etdirildi. Azərbaycan vətəndaşları Türkiyədə zəlzələdən zərərçəkmişlərə yardım üçün uzaqda yerləşən yaşayış məntəqələrindən yardım toplanma məntəqələrinə axın etdilər. Kimisi gödəkçə, şalvar, əlcək, bundan başqa, çətin vəziyyətdə olan insanlara çadır, yorğan, döşək, əl fənəri, generator və s. ehtiyac duyulan nə varsa göndərməyə can atdı".
C.Məmmədov qeyd edib ki, Prezident İlham Əliyev və birinci vitse-prezident Mehriban Əliyevanın tapşırıqlarına əsasən, Azərbaycanın dövlət və özəl qurumları yardım aksiyalarına qoşuldular:
"Qısa müddətdə yardım aksiyası böyük bir hərəkata çevrildi. Prezidentin bilavasitə tapşırıq və göstərişlərinə əsasən, hazırda Türkiyədə olan Fövqəladə Hallar Nazirliyinin çevik xilasetmə qüvvələri qardaş ölkədə baş vermiş güclü zəlzələnin fəsadlarının aradan qaldırılması və axtarış-xilasetmə əməliyyatlarını fasiləsiz davam etdirirlər. Azərbaycandan davamlı olaraq həkimlər, xilasedicilər, könüllülər göndərilir. Sona qədər Türkiyənin yanında olacağıq. Heç şübhəsiz, iki dost və qardaş ölkə bu sınaqdan da üzüağ çıxacaq. Yaşasın Azərbaycan-Türkiyə dostluğu və qardaşlığı!".
