“Rəsmi Tehran rəsmi Moskva ilə birgə hərəkət etmək niyyətindədir”
“Onlar strateji müttəfiq hesab edilirlər. Hətta cənub qonşumuz sülhməramlı heyətin tərkibində olmağa dair təkliflə çıxış edib”
“Zəriflə Lavrov təkcə Qarabağ yox, həm də ABŞ, Avropa İttifaqı və Türkiyə ilə münasibətlərdən də danışıblar”
Rusiya Xarici İşlər naziri (XİN) Sergey Lavrovla iranlı həmkarı Məhəmməd Cavad Zərif arasında telefon danışığı baş tutub. Müzakirə zamanı Dağlıq Qarabağdakı mövcud vəziyyətlə bağlı danışıblar. Bu barədə TASS Rusiya XİN-ə istinadla xəbər yayıb. Məlumatda qeyd olunur ki, Dağlıq Qarabağdakı mövcud vəziyyət, Rusiya tərəfinin münaqişə zonasında tam atəşkəsə nail olmaq üçün göstərdiyi səylər, həmçinin hərbi əməliyyatların təsirinə məruz qalan mülki əhaliyə humanitar yardımın göstərilməsi müzakirə edilib”.
Nazirlər, eyni zamanda, Suriya, Fars körfəzi, Yəmən və Əfqanıstandakı vəziyyət də daxil olmaqla, digər əsas mövzular ətrafında fikir mübadiləsi aparıblar.Qeyd olunur ki, Lavrov və Zərif ticarət-iqtisadi və humanitar sahələrə də toxunublar:
“Qarşılıqlı maraq doğuran məsələlərin bütün spektrləri üzrə dialoqun davam etdirilməsi barədə razılığa gəlindi”.
Deməli, rəsmi Tehran da , belə demək mümkünsə, “başını başlara qoşmağa çalışır”. Adama deyərlər ki, niyə öz işinlə məşğul olmursan? Onsuz da masa ətrafında kifayət qədər iştirakçı var...
Politoloq Sədrəddin Soltanın fikrincə, İranın əsas məqsədi məhz iştirakçılardan birinə çevrilməkdir. O, bu barədə “Sherg.az”a danışıb:
“İran regional dövlətdir. Ona görə də bölgədə baş verən bütün proseslərdə iştirak etmək, ən yaxşı halda məlumatlı olmaq istəyir. Həm də İran Rusiya ilə birgə hərəkət etmək niyyətindədir. Çünki strateji müttəfiq hesab edilirlər.
Hətta cənub qonşumuz sülhməramlı heyətin tərkibində olmağa dair təkliflə çıxış edib. 1991-ci ildən bəri Ermənistanın mövcudluğunda İran mühüm rol sahibidir. Son hadisələrdə də rəsmi Tehran işğalçıya dəstək verdi. Məhz İran yanacağının hesabına erməni tankları Qarabağda hərəkət edirdilər.
Ümumiyyətlə, Erməmistanla əməkdaşlığı, ticarət əlaqələrini daha çox bu dövlət saxlayıb. Ötən həftələrdə İran daha çox Rusiyanın addımlarını müdafiə edib. İndi də bunun qarşılığını istəyir. Amma bir məqamı da qeyd edim ki, digər BMT ölkələri kimi İran Azərbaycanın ərazi bütövlüyünü tanıyır. Fikrimcə, nazirlər arasındakı telefon danışığı da məsələnin ərazi bütövlüyümüz çərçivəsində həllinə yönəlib”.
S.Soltan, həmçinin bildirib ki, müzakirənin yeganə predmeti Qarabağ olmayıb:
“Həm Rusiya, həm də İran ABŞ, Avropa İttifaqının sanksiyalarına məruz qalıb. İki aydan sonra ABŞ-da hakimiyyət rəsmən dəyişəcək. Ona görə sözügedən müzakirələrin əsas mövzusundan biri də həm də ABŞ-la gələcək münasibətlərin necə qurulmasıdır. Hər halda Bayden güzəştə gedənə oxşamır. Başqa sözlə desək, o, əvvəlki siyasəti davam etdirəcək.
Yəni, ümumiləşdirəsi olsaq, nazirlər arasında telefon danışığının mövzuları təkcə Qarabağ yox, həm də ABŞ, Avropa İttifaqı və Türkiyə ilə münasibətlər olub”.
