"Prezident İlham Əliyevin Yeni il münasibətilə Azərbaycan xalqını təbrik çıxışında yola saldığımız 2018-ci ilin ölkəmiz üçün iqtisadi baxımdan uğurlu il olduğu qeyd edildi. Ölkə başçısı digər sahələrdə və yaxud istiqamətlərdə nələr əldə etmişiksə, məhz buna əsaslandığını nəzərə çatdırdı. Prezident bildirdi ki, bütün bu işləri görmək üçün güclü iqtisadiyyat olmalıdır və bu iqtisadiyyat var. "Bu gün Azərbaycan iqtisadi inkişaf baxımından heç kimdən asılı deyil."- deyə o, nəzərə çatdırdı".
Bu barədə "Sherg.az"a iqtisadçı- ekspert Pərviz Heydərov bildirib.
Onun sözlərinə görə, 2018-ci ilə dair müvafiq iqtisadi yekunlar haqda rəqəmlər yaxın günlər açıqlanacaq:
"Lakin ölkə rəhbərinin qeyd etdiyi kimi, ötən il ümumi daxili məhsulun artdığı, qeyri-neft sektorunun inkişaf etdiyi, sənaye istehsalının genişləndiyi, qeyri-neft sənaye sektorunda artımın 9 %-dən çox təşkil etdiyi, həmçinin ixracımız təxminən 40 % civarında çoxaldığı bəllidir. Ölkə iqtisadiyyatına 10 milyard dollar sərmayə qoyulduğu da məlumdur. Ümumiyyətlə, 2018-ci il bir il əvvəl təşəkkül tapmış ümumi iqtisadi sabitlik üzərində müsbət meyllərin inkişaf etməsilə yadda qaldı. Bir çox istiqamətlərdə sabitliyin gələcəkdə möhkəm dayaqlar üzərində köklənməsinə xidmət edən müvafiq dinamika müşahidə edildi ki, bu, olduqca zəruri xarakter daşıyır. Çünki ölkədə həyata keçirilən ümumi iqtisadi kurs məhz bu məqsədə xidmət edir. Başqa sözlə desək, ümumi iqtisadi artımın əvvəlki illərdə olduğu kimi ikirəqəmli olmasa da, birrəqəmli səviyyədə inkişafı müsbət qiymətləndirilməlidir.
Bütün bu qeyd olunanlar baxımdan, dövlət başçımızın Yeni il münasibətilə Azərbaycan xalqını təbrik çıxışında artıq, arxada qalmış və tarixə çevrilən ildə iqtisadiyyatdakı vəziyyət, o cümlədən, buna əsasən, meyllər hamısı çox mükəmməl və həssaslıqla bəyan edildi".
Ekspert onu da əlavə edib ki, ölkəmiz 2015-2016-cı illərdə üzləşdiyi çətinlikləri 2019-cu ildə tamamilə aradan qaldıra bilər:
" 2019-cu ildə ölkəmizin iqtisadiyyatının yaxın keçmişdə, yəni 2015-2016-cı illərdə neftin dünya bazar qiymətlərinin düşməsiylə əlaqədar üzləşdiyi məlum böhrandan tam çıxa bildiyini şərtləndirən tamamilə yeni modelə transformasiya bu il ərzində çox uğurla başa çata bilər. Sadəcə olaraq, bundan ötrü islahatların daha da dərinləşdirilməsi, tədbiq ediləcək yeni vergi dəyişikliklərinin səmərəli nəticə verməsi, qeyri-neft sektorunu lokomotivə çevirmək işləri sürətləndirilməlidir. Ümumiyyətlə, 2019-cu ilin islahatların birinci mərhələsinin uğurlu konkret nəticələrlə dolu bir yekun ili olacağına böyük ümid var".
Ayyət Əhməd
