"Bakıda böyük soyqırımı memorial kompleksi yaradılsa, ölkəmizə gələn qonaqlar bu xalqın soyqırımı tarixini daha yaxşı mənimsəyər”.
Bunu "Sherg.az”a 31 Mart soyqırımının 100-cü ildönümü haqqında danışarkən tarix üzrə fəlsəfə doktoru Taleh Cəfərov söyləyib.
O, soyqırımının 100 illiyi ilə bağlı axşam saatlarında yürüş təşkil olunmasını təklif edib:
"Soyqırımı abidəsinə sakit yürüş etmək olar. Bizdə adətən belə yürüşlər gündüz edilir. Hamı gülə-gülə yol ilə səpələnir, soyqırımı abidəsinin anıldığı belə duyulmur. Yaxşı olar ki, gənclər, şəhər sakinləri gecə vaxtı əllərində şamlarla abidəni ziyarət etsin.
Həmçinin, soyqırımına məruz qalmış xalqların simpoziumunu təşkil etmək olar. Bu xalqların nümayəndələrinin iştirakı genosid probleminin müzakirəsinin daha effektiv aparılmasına kömək edər.
Ali məktəblər arasında soyqırımı ilə bağlı intellektual yarış təşkil olunsa, gənclərin maariflənməsini təmin edə bilərik”.
Qeyd edək ki, 31 Mart soyqırımı 1918-ci ilin 30 mart və 3 aprel tarixləri arasında Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan, və digər ərazilərdə Bakı Soveti və Daşnaksütun partiyasından olan erməni silahlı dəstələrinin azərbaycanlılara qarşı törətdikləri qırğındır.
1998-ci ildən 31 mart Azərbaycan Respublikasında dövlət səviyyəsində Azərbaycanlıların soyqırımı günü kimi qeyd edilir.
Aysel Aslan
