"Ola bilər, Amerikanın Azərbaycana səfir təyin etməməsini ABŞ Administrasiyasının ölkəmizə marağının az olmasından irəli gəlir”.
Bunu "Sherg.az”a cari ilin mart ayından bəri ABŞ-ın Azərbaycana səfir göndərməməsinin səbəblərini şərh edərkən politoloq İlqar Vəlizadə söyləyib.
O qeyd edib ki, Amerika üçün mühüm olan ölkələrə uzun müddət səfir təyin edilməməsi imkansızdır:
"Amerika ilə sıx münasibətdə olan ölkələrlə belə hallar baş vermir. Görünür, ABŞ-ın Azərbaycanla bağlı düşüncəsi başqadır. Diqqətə çatdırmalıyam ki, bu, ilk belə hal deyil. Ötən illərdə də Amerika səfirlərindən biri səlahiyyətini başa vurduqda təxminən bir il müddətində səfir göndərilmədi.İstənilən halda Azərbaycan region üçün önəmli ölkədir. Cəmiyyətdə ABŞ-ın Azərbaycana marağının aşağı səviyyədə olması ilə bağlı fikir formalaşmasını istəməzdik. Amerika rəsmi Bakı ilə münasibətləri daha adekvat şəkildə qurmağa çalışırsa, ölkəmizə səfir təyin etmək üçün addım atmalıdır”.
Qeyd edək ki, Amerikanın Azərbaycandakı səfiri Robert F. Sekuta ölkəmizdə üç ildən çox, Dövlət Departamentində isə uzun müddət çalışdıqdan sonra, Bakıdakı vəzifəsini mart ayının sonunda bitirdi. R. Sekutanın vəzifədən getməsindən sonra Amerika Azərbaycana səfir təyin etməyib.
Aysel Aslan
