"ABŞ və Rusiya riskləri nəzərə alaraq, isti müharibəyə getməyəcək”.
Bunu "Sherg.az”a iki supergüc arasında gərginliyin yaranmasından danışarkən politoloq İlqar Vəlizadə deyib.
Onun sözlərinə görə, tərəflərin bir-birinə ünvanladığı təhdidlər sadəcə ritorikadır:
"Amerika müharibəyə başlamaq istəsəydi, başqa regionda Şimali Koreya ilə başlayardı. Çünki bu dövlətlə müharibə olacağına daha böyük ehtimallar var idi. Amerikanın bu məsələdə maraqları olsa da, müharibə səviyyəsinə gətirəcək məsələ yoxdur”.
Lokal müharibə ehtimallarına gəlincə, politoloq deyib ki, bu əməliyyatları reallaşdırmaq üçün konkret səbəblər və əməllər lazımdır:
"Hələ ki, gərginlik yaradan sadəcə sözlərdir. İki dövlət arasında bu cür ritorikalar, "söz müharibəsi” çox olub. Yəqin ki, bütün hallarda ABŞ bu bölgədə, Suriya münaqişəsində onu dəstəkləyən qüvvələrin az olduğunu nəzərə alacaq. Halbuki Rusiyanı dəstəkləyən ən azından Türkiyə dövləti var”.
Qeyd edək ki, ABŞ prezidenti Donald Tramp Suriyaya raket zərbələri endiriləcəyi barədə anons verib. O özünün sosial şəbəkə hesabında "Rusiya Suriyaya doğru buraxılacaq bütün raketləri vuracağını vəd edir. Hazırlaş, Rusiya. Ona görə ki, raketlər gələcək – yaxşı, yeni və "ağıllı” raketlər. Xalqını qazla öldürən və bundan zövq alan bir heyvanla ortaq olmamalısan", - şəklində paylaşım edib.
Rusiyanın bu mesaja cavabı da gecikməyib. Belə ki, Rusiya Xarici İşlər Nazirliyinin rəsmi nümayəndəsi Mariya Zaxarova özünün "Facebook” hesabında:
"Ağıllı raketlər bir neçə ildir öz ərazisində beynəlxalq terrorçuluqla mübarizə aparan qanuni hökumətə deyil, terrorçular tərəfə uçmalıdır", - deyə Amerikaya cavab ünvanlayıb.
Aysel Aslan
