Cəlilabad rayonunda 2 yaşlı uşaq faciəvi şəkildə ölüb. Hadisə rayonun Hasılı kəndində baş verib. 2016-ci il təvəllüdlü Bağırov Mirkamil Samir oğlu nəzarətsiz qalaraq evdə olan milçək dərmanını içib.
Məlumata görə, M.Bağırovun babası feldşerdir. Elə ilk tibbi yardımı da o göstərib. Xəstəyə sistem köçürüb. Lakin azyaşlının vəziyyəti pisləşdiyi üçün o, təxminən iki saatdan sonra ağır vəziyyətdə Cəlilabad Rayon Mərkəzi Xəstəxanasına gətirilib. Xəstəyə Reanimasiya şöbəsində göstərilən bütün yardımlara baxmayaraq o, dünyasını dəyişib.
Bu cür xoşagəlməz halların baş verməməsi üçün təbii ki, valideynlərin maksimum dərəcədə diqqətli və məsuliyyətli olması ön plana keçir. Əsas məsələlərdən biri də ilkin yardımın göstərilməsidir. Bəlkə də düzgün formada müdaxilə olunsaydı, körpənin həyatını xilas etmək mümkün olardı. Lakin azyaşlıya ilkin yardım edilməsinə baxmayaraq hadisənin sonu faciə ilə bitib. Demək, xüsusilə valideynlərin belə məqamlara daha həssas yanaşması və ciddi olması çox vacibdir. Əks halda belə neqativ hadisələr yenə təkrarlanacaq.
Həkim-pediatr Vaqif Qarayev də "Şərq”ə açıqlamasında valideynləri diqqətli olmağa səsləyib. Pediatrın sözlərinə görə, ağcaqanad dərmanlarının tərkibində müxtəlif zəhərli və kimyəvi maddələr var:
"2 yaşlı uşağı zəhərləyən dərmanın tərkibində hansı maddələrin olduğunu deyə bilmərəm. Ağcaqanadlar bizim daimi qonaqlarımızdı. Təbii ki, dərmanlardan istifadə eləmək lazımdır, amma birmənalı şəkildə bilməliyik ki, əgər bu dərman hansısa bir canlını öldürürsə, deməli, körpə uşağa da ziyanları olacaq.
Məsələn, ağcaqanad əleyhinə dərman var ki, onlar birdəfəlik istifadə üçün deyil, xüsusi aparatdır və bütün gecəni yanır. Həmin bu aparat vasitəsilə xüsusi bir hava yaranır və ağcaqanad ölür. Lakin bu, düzgün deyil, xüsusən körpə uşaq olan otaqlarda belə dərmanları yandırmaq qətiyyən olmaz”.
Yeganə Bayramova
