"Son iki gündə yaranmış problemlər – elektrik enerjisinin dayandırılması, su təchizatında problemlər, "Bakı Metropoliteni”nin müvəqqəti fəaliyyət göstərməməsini xaos kimi təqdim etmək düzgün deyil”.
Bu barədə "Sherg.az”a millət vəkili, siyasi elmlər doktoru Elman Nəsirov bildirib.
O vurğulayıb ki, bu texniki problemdir və artıq aradan qalxır:
"Mingəçevir İES-də yaranmış problemin arada qaldırılması üçün ardıcıl, effektiv iş aparılır. Məsələ ölkə başçısı, prezident İlham Əliyevin tam nəzarətindədir. Bunun nəticəsidir ki, xüsusi Dövlət Komissiyası yaradılıb, qurumun fövqəladə iclası keçirilib. Artıq proseslər qaydasına düşür. Narahatlığa ehtiyac yoxdur”.
Qeyd edək ki, iyulun 2-dən 3-nə keçən gecə Mingəçevir şəhərində fəaliyyət göstərən ölkənin ən böyük elektrik stansiyası olan Azərbaycan İES 6-cı enerji blokunda partlayış baş verib və yanğın olub. Bundan sonra paytaxtda və ölkənin əksər rayonlarında elektrik enerjisinin verilməsi dayandırılıb. Vəziyyət bərpa olunsa da, elektrik enerjisinə bağlı olan paytaxtın su təchizatında və "Bakı Metropoliteni”nin fəaliyyətində fasilələr yaranıb.
Aysel Aslan
