Paşa Əhmədzadə qan xərçəngindən əziyyət çəkən 10 yaşlı oğluna kömək xahişilə Media.Az-ın redaksiyasına müraciət edib.
Yalnız sümük iliyi nəqli uşağı xilas edə bilər. Ancaq əməliyyatın dəyəri ailə üçün olduqca yüksəkdir - 83 min dollar.
İyulun əvvəlində Eldarın valideynləri onun dərisinin saraldığını, əllərinin göyərdiyini, dodaqlarının solğunlaşdığını görüblər. Uşaq özü də zəiflikdən şikayət etməyə başlayıb.
Atasının dediyinə görə, iyulun 16-da Eldar qan analizi verib və nəticədə hemoqlobin səviyyəsinin çox aşağı düşdüyü məlum olub.
“Normal diapazonda minimum göstərici 11 olmalıdır, Eldarda isə 3.9 idi. Hematologiya İnstitutunda müalicə təyin edildi və qan köçürüldü. İki həftədən sonra qan analizi heç bir yaxşılaşma göstərmədi. Talassemiya Mərkəzindən həkim Svetlana xanım uşağın sümük iliyinin müayinəsində israr etdi. Təəssüf ki, həkimin qorxuları özünü doğrultdu. Kəskin leykoz diaqnozu təsdiqləndi.
Türk mütəxəssislərlə məsləhətləşmələrdən sonra müalicə üçün İstanbula getməyi qərara aldıq. Burada avqustun 13-dən etibarən Eldarın kimya terapiyasına başladıq.
Önümüzdəki altı ayda oğlum İstanbulda dörd kimya terapiyası kursu alacaq və bundan sonra sümük iliyi transplantasiyası əməliyyatından keçəcək. Bu ölümcül xəstəliyə qalib gəlmək üçün hər şeyi edəcəyik. Ancaq hazırda hər şey maliyyə vəziyyətindən asılıdır. Bu, ailəmiz üçün dözülməz bir yükdür. Yardım üçün ictimaiyyətə müraciət etmək məcburiyyətindəyik. Hər bir kimya terapiyası seansı 12-15 min dollara başa gəlir. Sümük iliyi nəqli isə 83 min dollardır. Kirayə evlərə də pul xərcləyirik. Xahiş edirəm oğluma kömək edin, onun cəmi 10 yaşı var ”, - deyə Eldarın atası bildirib.
Media.Az-ın redaksiya heyəti biganə qalmayan hər kəsi Əhmədzadə ailəsinin probleminə anlayış göstərməyə və bacardıqları qədər kömək etməyə çağırır.
Paşa Əhmədzadə ilə telefonla əlaqə saxlaya bilərsiniz: +994 55 207 11 22.
