"Jurnalistlərə vaxtında, dəqiq və dolğun informasiya verməklə baş verən hadisələr haqqında dezinformasiyaların yayılmasının qarşısını almaq olar”.
Bunu "Sherg.az”a Mingəçevir İES-də baş verən qəza nəticəsində ölkənin elektrik təminatında yaranan problemlər, Gəncə şəhər İcra Hakimiyyətinin başçısı Elmar Vəliyevə qarşı sui-qəsdin təşkil edilməsi kimi hadisələrlə bağlı mətbuatda, sosial şəbəkələrdə dezinformasiyaların yayılmasının səbəblərini izah edərkən "Bizim yol" qəzetinin və bizimyol.info portalının baş redaktoru Bahəddin Həziyev söyləyib.
O diqqətə çatdırıb ki, mötəbər informasiyalar olmadıqda xəbərlərin yerini şayiələr tutur:
"İnsanlar rəsmi qurumların informasiyaları gizlətmək cəhdini gördükdə, alternativ informasiya mənbələri axtarmağa başlayırlar. Bu zaman xüsusi məqsədli qüvvələrin meydanı genişlənir, "yalan ayaq tutub yeriyir”. Ona görə, dövlət qurumları, onların rəsmi şəxsləri, mətbuat xidmətlərinin rəhbərləri daim mətbuatı məlumatlandırmalıdır ki, şayiələrə meydan qalmasın.
Əksərən səlahiyyətli qurumların informasiya fəaliyyətində, medianı məlumatlandırmasında natamamlıq müşahidə edirik. Bəzi mətbuat xidmətləri rəhbərləri gizlənməyə çalışırlar. Son hadisələr zamanı da eyni situasiya yarandı. Mətbuat xidmətlərinə səslənirəm, bu, iş deyil. Mətbuata açıqsınızsa, səmimi işgüzar münasibət qurmaq istəyirsinizsə, problem olmayacaq. Biz jurnalistlərin "çörəyi” xəbərdir. Bizə vaxtında, dəqiq və dolğun məlumat verin, qalanından narahat olmayın”.
Aysel Aslan
