"Avropa Birliyinə oxşar Türk Birliyinin yaradılması təklifini müsbət dəyərləndirirəm”.
Bu barədə "Sherg.az”a Türk Dünyası Parlamentlər Birliyinin (TDPB) sədri və Trabzon millət vəkili Nail Çələbinin Türk Birliyinin yaradılması təklifini dəyərləndirərkən sabiq millət vəkili, xalq şairi Sabir Rüstəmxanlı bildirib.
Onun sözlərinə görə, hələ türk dövlətləri öz müstəqilliyini elan etdiyi dövrdə o istiqamətdə addımlar atılmalı idi:
"Türk Konseyi adlı qurum var. Bura ancaq Türkiyə, Azərbaycan, Qazaxıstan və Qırğızıstan daxildir. Ona görə, bu istiqamətdə iş görülməlidir. Təəssüf ki, türk respublikalarının bəziləri Rusiyanın, xarici qüvvələrin təsirindən xilas ola bilmirlər. Halbuki siyasi iradə ortaya qoyulsa, birliyin yaradılmasına heç bir maneə olmaz”.
Türk birliyinin mərkəzinin hansı şəhər olmasına gəlincə, S.Rüstəmxanlı bunun o qədər vacib olmadığını diqqətə çatdırıb:
"Hazırda Beynəlxalq Türk Akademiyasının mərkəzi Astana şəhəridir. Türk parlamenti Bakıda, Türk Şurası isə İstanbuldadır. Birliyin bu şəkildə bölüşdürülərək sistemləşdirilməsi mümkündür. Əsas məsələ, ümumi pasport sistemi, ümumi iqtisadi zona, vizasız gediş-gəliş məsələlərin reallaşdırılmasıdır”
Qeyd edək ki, Türk Dünyası Parlamentlər Birliyinin (TDPB) sədri və Trabzon millət vəkili Nail Çələbi Türkiyə Böyük Millət Məclisinin (TBMM) Beşevlərdəki ictimai təsislərində mətbuat mənsublarıyla bir araya gəlib. Çələbi Avropa Birliyi kimi Türk Birliyinin yaradılmasının vacib olduğunu söyləyib.
Aysel Aslan
