"Bazar iqtisadiyyatı qaydaları ilə yanaşsaq, ani fövqəladə vəziyyətlərdə mağazalarda, iri supermarketlərdə fürsətdən istifadə edərək qiymətləri bahalaşdıran sahibkarları qınamaq mümkün deyil”.
Bunu "Sherg.az”a ötən gün Mingəçevir İES-də baş verən qəzadan sonra ölkə ərazisində elektrik enerjisinin dayandırılmasından istifadə edən sahibkarların müxtəlif məhsulların qiymətlərini qaldırmasına münasibət bildirərkən iqtisadçı - ekspert Natiq Cəfərli söyləyib.
Onun fikrincə, biznes mühitində rəqabət yüksək olmalıdır ki, sahibkarlar bu cür gərginlik şəraitindən sui-istifadə etməsinlər:
"Supermarketlər vergisini ödədikləri məhsulları alandan sonra əhaliyə istədikləri qiymətə sata bilərlər. Sadəcə burada biznesin sosial məsuliyyəti olmalıdır. Sosial məsuliyyət olmasa, o biznes heç bir işə yaramır. Biz isə biznes strukturlarında sosial məsuliyyətin olmadığı, bütün vəziyyətlərdə fürsətçiliyin önə çıxdığı mühitdə yaşayırıq. Bu baxımdan, təbliğat və təşviqat işlərinə, sözügedən biznes strukturlarının ictimai qınaq obyektinə çevrilməsinə, fürsətçiliklə məşğul olan biznes strukturlarının boykot olunmasına ehtiyac var. Nəticə etibarı ilə, belə mənfi situasiyaların qarşısını almaq mümkündür”.
Qeyd edək ki, sosial şəbəkələrdə paylaşılan məlumatlardan aydın olur ki, ötən gün paytaxt ərazisində elektrik enerjisinin dayandırıldığı, su təchizatında problem yarandığı vaxtda bəzi supermarketlər su və şam kimi məhsulların qiymətini süni şəkildə qaldırıb. Bundan narazılıq ifadə edən əhali fotolarla sosial şəbəkələrdə həmin biznes strukturlarına etirazını çatdırıb.
Aysel Aslan
