"Bu gün, həqiqətən, elə dindarlar var, xarici ölkələrə gedir, orada müxtəlif fəaliyyət göstərdikdən sonra həmin dövlətlərin təsirlərinə düşə bilərlər”.
Bunu "Sherg.az”a Gəncənin icra başçısı Elmar Vəliyevin həyatına sui-qəsd etmiş, Yunis Səfərovu təlim keçməsi məqsədilə Suriyaya göndərən Tohid İbrahimbəylinin "Hüseyniyyun" (Hüseynçilər) adlı silahlı dəstə yaratmasına münasibət bildirərkən ilahiyyatçı Hacı Atif İsmayılov söyləyib.
O diqqətə çatdırıb ki, bəzi dindarlar, radikal əməllərə yol verən şəxslər və ya cinayətkarlar Azərbaycan ərazisinə daxil ola bilmədiyindən, qanunsuz əməlləri üzündən cəmiyyətdə qəbul olunmadığından müxtəlif informasiyalar yayırlar:
"Əslində guya həmin şəxslər internetdə, sosial şəbəkələrdə Azərbaycan əleyhinə məlumatlar yaymaqla, kənardan təxribat törətməklə acıq çıxırlar. Halbuki dindən sui-istifadə edib, kimsə digər bir şəxsi qətlə yetirirsə, dövlətçiliyimizə təhlükə törədirsə, bunun heç bir əsası yoxdur. Belə əməllər dinə, insanlığa sığmır. Amma bu, insanların özlərinin ideologiyasından irəli gələn amildir. Bir insan xalqına, millətinə xidmət etmək istəyirsə, sivil yolunu tapmalıdır. Güc tətbiq etməklə, kimisə öldürməklə, sui-qəsd etməklə məqsədlərini həyata keçirmək insanların özündəki acizliyin nümunəsidir”.
Qeyd edək ki, Gəncə şəhəri İcra Hakimiyyətinin başçısı Elmar Vəliyevin həyatına sui-qəsd törətmiş Yunis Səfərovu hərbi təlimlər keçmək və döyüşlərdə iştirak etmək üçün Suriyaya göndərmiş Tohid İbrahimbəylinin bu istiqamətdə İranda dini təhsil alan azərbaycanlı tələbələri toplayaraq, təlimatlandırdığı məlum olub. T. İbrahimbəyli 2015-ci ilin sonu, 2016-cı ilin əvvəllərində Qum və Məşhəd şəhərində dini təhsil alan 14 nəfərə Suriya ərazisində İŞİD ilə mübarizə üçün azərbaycanlı tələbələrdən ibarət "Hüseyniyyun" (Hüseynçilər) adlı silahlı dəstə yaratmaq niyyətində olduğunu bildirib.
Aysel Aslan
