"Şəhərsalma haqqında qaydalarda küçədə, piyada keçidlərində əlillər üçün pandusların qoyulması mütləq qeyd olunur”.
Bunu "Sherg.az”a Bakı şəhərinin mərkəzindəki bütün piyada keçidlərində Avropa standartlarına uyğun 421 ədəd pandusun qoyulacağına münasibət bildirərkən Vətən Müharibəsi Əlilləri İctimai Birliyinin sədri Firudin Məmmədov deyib.
O xatırladıb ki, tikintinin sürətlə inkişaf etdiyi, şəhərin gözəlləşdirildiyi dönəmdə bu məsələ gündəmə gətirildi:
"Həmin vaxt müəyyən addımlar da atıldı. Bəzi yerlərdə panduslar qoyulsa da, bu mexanizm düzgün yerinə yetirilmədi. Gürcüstanda elə səki, piyada keçidi yoxdur ki, orada bordürlər olsun. Bizdə isə əvvəllər qoyulan pandusların da bucaq dərəcəsi yüksək oldu. Nəticədə həmin panduslar heç nəyə yaramadı. Əlil arabada olan şəxsin keçidə, metroya düşməsi bir yana, analar bir yaşında körpəsini uşaq arabasında çıxara bilmir. Şəhərin lazımi yerlərində pandusların qoyulması zəruridir. Tək əlillər deyil, bu, gənc analar üçün də vacibdir.
Bir dəfə arabada olan bir nəfəri panduslarla düşürməyə cəhd etmişəm. Fiziki cəhətdən yetərincə güclü olsam da, həmin panduslardan arabanı qaldırıb, düşürə bilmədim. Ona görə, həmin pandusların da sökülüb yenidən düzəldilməsinə ehtiyac var. Panduslar 20-25 dərəcə bucaq altında qoyulmalıdır.
Avtobusların, ictimai nəqliyyat vasitələrində arabaların çıxarılması üçün panduslu variantını işlək hala gətirmək lazımdır. Məsələn, Avropa Oyunlarında istifadə edilən yeni avtobuslarda həmin panduslar var idi. Lakin istifadə olunmadı. Çünki dayanacaqlarda arabalı insanlar dayanmır. Çünki onların evdən çıxıb, dayanacağa qədər gəlməsi mümkün deyil. Amma əlil insan onun üçün şərait yaradıldığını bilsə, evə qapanıb qalmaz. Ürəyi istəyəndə şəhərə çıxar".
F.Məmmədov onu da əlavə edib ki, parlamentdə, rəsmi qurumlarda ümumən əlillərin ictimai hərəkəti ilə bağlı qanunlar qəbul edərkən əvvəldən hazırlıq görülməlidir:
"Məsələn, Böyük Britaniyada gözdən əlillər haqqında qanunlar müzakirəyə çıxarılarkən spiker bir gün əvvəl tapşırıq verir ki, deputatlar gözünü bağlasın, 1 gün kor şəklində yaşasın. O zaman korlar haqqında qanuna nə lazım olduğunu qismən də öyrənə bilsin. Məncə, bu təcrübə kifayət qədər uğurludur. Çünki bizdə gözü görməyən əlillər üçün də heç bir şərait yoxdur. Nəticədə gözü görməyən, ayağı yeriməyən insan Bakı şəhərində yaşaya bilmir”.
Qeyd edək ki, əmək və əhalinin sosial müdafiəsi naziri Səlim Müslümovun sözlərinə görə, Bakı Nəqliyyat Agentliyinin baş direktoru Vüsal Kərimli ilə bu məsələ müzakirə olunub və BNA bu məqsədlə tender elan edib. Nazir vurğulayıb ki, "Eko" şirkəti həmin tenderin qalibi elan olunub və həmin şirkətlə 2 milyon manat məbləğində müqavilə imzalanıb. Həmin müqavilənin icrası çərçivəsində 421 pandusun quraşdırılması təmin olunacaq.
Aysel Aslan
