Ermənistanın baş naziri Nikol Paşinyandan sonra prezident Armen Sarkisyan da Azərbaycanın işğal altında olan Dağlıq Qarabağ bölgəsinə, Şuşa şəhərinə gəlib. Məlumata əsasən, Sarkisyan separatçı rejimin nümayəndələri ilə görüşüb. Xatırladaq ki, daha öncə Azərbaycanın işğal olunmuş ərazilərinə Ermənistan baş nazirinin həyat yoldaşı Anna Akopyan və rusiyalı qadınlardan bir qrup getmişdi. Səfərdən sonra həmin şəxslərin hamısı Xarici İşlər Nazirliyinin "arzuolunmaz şəxslər” siyahısına salınıb. Bəzi analitiklərin qənaətincə, növbədənkənar seçki öncəsi həm Paşinyanın, həm də prezident Armen Sarkisyanın Qarabağa getməsi və separatçı rejimlə görüşməsi siyasi məqsədlərə xidmət edir. Yeni rəhbərliyin əsas niyyəti qondarma rejimin dəstəyini qazanmaq, seçki öncəsi hər hansı problemlə üzləşməməkdir.
Düşmən ölkə rəhbərliyinin tez-tez Qarabağa getməsini "Şərq”ə şərh edən politoloq Vasif Əfəndiyev bildirib ki, Ermənistan baş naziri Nikol Paşinyan meydan hərəkatının gücündən növbəti dəfə yararlanaraq, gələn ilin iyun ayında keçirilməsi nəzərdə tutulan parlament seçkisini bu ilin dekabrına çəkə bildi:
"Paşinyanın bu gedişi "Qarabağ klanı” adlanan siyasi müxalifətə ağır zərbə oldu. Görünən odur ki, Paşinyan bu klanı bütünlüklə erməni siyasətindən silməkdə qərarlıdır. Buna baxmayaraq, rusyönümlü qüvvələr könüllü təslim olmaq niyyətində deyillər. Onlar Paşinyanı ən zəif yerindən, "Dağlıq Qarabağ” cəbhəsindən vurmaq istəyirlər. Dağlıq Qarabağın rəhbərliyində təmsil olunan separatçılar da Paşinyanın tam qələbəsindən sonra hakimiyyətdə qala bilməyəcəklərini hesablayıblar. Bu səbəbdən Paşinyana müqavimət göstərmək niyyətlərini gizlətmirlər.
Paşinyanın Qarabağa səfərinin ardından prezident Armen Sarkisyanın Şuşaya getməsi bu münasibətləri normallaşdırmaq məqsədi güdür. Lakin tam əminliklə deyirəm ki, Paşinyan İrəvanda tam hakimiyyətə sahib olduqdan sonra separatçı rejimin bütün rəhbərliyi istefaya göndəriləcək. Hətta onların bir çoxuna qarşı cinayət işi açılacaq”.
İsmayıl
