ATƏT-in Minsk Qrupu həmsədrlərinin regiona səfəri zamanı erməni snayperi tərəfindən Azərbaycan Ordusunun zabiti Aqil Omarov qətlə yetirildi. Şübhəsiz ki, təxribatın törədilməsində məqsəd Ermənistan tərəfinin cəbhə bölgəsində vəziyyəti gərginləşdirmək, danışıqlar prosesinə əngəl yaratmaq və 25 ildir davam edən münaqişədə mövcud status -kvonu qoruyub saxlamaqdır.
Düşmənin bu addımı bir daha təsdiq edir ki, işğalçı ölkə münaqişənin həllində maraqlı deyil. Onların sülh, atəşkəsə riayət olunması və digər bu kimi iddiaları yalnız beynəlxalq ictimaiyyəti aldatmaq məqsədi güdür.
Qarabağ Azadlıq Təşkilatının sədri Akif Nağı "Sherg.az”a açıqlamasında təəssüflə qeyd edib ki, ATƏT-in Minsk Qrupu hadisədən 1 gün sonra səfərin yekununa dair bəyənat verdi.
QAT sədrinin sözlərinə görə, Minsk Qrupu hadisə ilə bağlı heç bir araşdırma aparmayıb:
"Ermənistanın bu təxribatı ATƏT-in gözü qarşısında baş verdi. Onlar sadəcə olaraq "təmas xəttində insan tələfatına görə təəssüf edirik” kimi bir ifadə səsləndirdilər. Dəfələrlə ermənilərin bu cür əməllərinin şahidi olmuşuq.
Nə qədər zabitlərimiz, komandirllərimiz qətlə yetirilib. Bu cür cinayətlərə göz yumulması növbəti dəfə nümayiş etdirdir ki, ATƏT-in Minsk Qrupu ermənilərin tərəfindədir. Onlar ermənilərin işğalçı siyasətini dəstəkləyirlər.
Ermənistanda hakimiyyət dəyişdi və bunun heç bir fərqi yoxdur. Onlar açıq şəkildə Azərbaycana meydan oxuyurlar, geri çəkilmək istəmirlər və imkan düşdükcə cəbhədə əsgərlərimizi, zabitlərimizi qətlə yetirirlər. Bütün bunlar onu göstərir ki, Ermənistan nə torpaqları geri qaytaracaq, nə də danışıqlarda nəyəsə razılaşacaq. Fikrimcə beynəxalq təşkilatların və Ermənistanın özünü bu şəkildə nümayiş etdirməsindən sonra Azərbaycan danışıqların davam etdirilməsinin heç bir əhəmiyyəti olmayacağına dair nəticə çıxarmalıdır”.
Yeganə Bayramova
