"Bir ölkənin səfiri bəyanat verərkən bunu sadəcə onun şəxsi fikri kimi dəyərləndirmək olmaz”.
Bunu "Sherg.az” açıqlmasında Qərbi Kaspi Universitetinin professoru Fikrət Sadıqov deyib.
Ekspert bəyan edib ki, diplomatik nümayəndələrin rəsmi açıqlamaları birbaşa təmsil etdiyi dövlətin bəyanatı sayılır:
"Əgər ABŞ-ın Ermənistandakı səfiri fəaliyyət göstərdiyi ölkədə bu cür ifadələr səsləndirirsə, bu özü-özülüyündə rəsmi Vaşinqtonun mövqeyidir. Əlbəttə, səfirin Dağlıq Qarabağ münaqişəsinin həllinə bu şəkildə yanaşması bizi qane edir və maraqlarımıza cavab verir. Reallıq odur ki, işğal olunmuş torpaqlarımız azad edilməyənə qədər heç bir maddə ətrafında danışıq aparmaq mümkün deyil. Bu məsələ münaqişənin mərhələli həllində, yəni Madrid prinsiplərində də öz əksini tapıb. Sözsüz ki, bu cür açıqlama erməniləri qıcıqlandırmaya bilməz. Amma hər halda reallıq budur. Düşmən ölkənin yeni rəhbərliyi bəyanata xüsusi diqqət yetirməli, həmsədr ABŞ-ın mövqeyini nəzərə almalıdır”.
Qeyd edək ki, ABŞ-ın Ermənistandakı səfiri Riçard Mills erməniləri məyus edən açıqlama ilə çıxış edib. Amerikalı səfir bunu işğalçı ölkənin özündə, erməni mətbuatına açıqlamasında dilə gətirib. Səfir bildirib ki, Dağlıq Qarabağ münaqişəsinin həll olunması üçün işğal olunmuş ərazilərin bir hissəsi Azərbaycana qaytarılmalı, İrəvan kompromislərə getməlidir.
İsmayıl
