"İnsanlarda panikaya səbəb olacaq, cəmiyyətdə gərginlik yaradacaq və dezinformasiyaların artmasına gətirib çıxaracaq şərait yaranmamalı idi”.
Bunu "Sherg.az”a sosioloq, professor Əhməd Qəşəmoğlu söyləyib. Onun sözlərinə görə, enerji sahəsinə cavabdeh qurumlar şəbəkəni elə qurmalı idi ki, ölkənin bir hissəsində elektrik dayandıqda digər bölgələrdə elektrik saxlansın:
"Vəziyyət elə olmalı idi ki, insanlar bu dərəcədə pis vəziyyətə düşməsin. Maraqlısı budur ki, müvafiq qurumlar əhaliyə elektrik enerjisinə qənaət etmələrini məsləhət görüblər. Amma belə təhlükə var idisə, əvvəldən xəbərdarlıq edilməli idi.
İstənilən halda cəmiyyətdə gərginlik yarada biləcək, yaranmış vəziyyətdən öz məqsədləri üçün istifadə edəcək qüvvələr olur. Əsas problem sosial şəbəkələrdə insanların ürəyi nə istəyir, onu yaza bilməsidir. Bu sahədə böyük fəaliyyət göstərilməli, yeni mexanizmlər yaradılmalı, maarifləndirmə daim aparılmalıdır. Dezinformasiyaların qarşısının tam alınması mümkün deyil. Maraqlı qüvvələr hər zaman adi problemdən istifadə edib, öz məqsədlərini həyata keçirəcəklər. Çalışmaq lazımdır belə situasiya yaranmasın.
Paralel olaraq, tənqidlər səsləndirmək lazımdır ki, mətbuatda və sosial şəbəkələrdə dezinformasiya yaymaqla insanların psixologiyasına mənfi təsir edirlər. Bunu insanlara aşılmaq lazımdır. Halbuki maarifləndirmə aparmalı olan təsisatlar – məsələn, televiziyalar bütün gün şou-proqramlar yayımlamaqla məşğuldur. Belə vacib problemlərlə bağlı əhalini maarifləndirmirlər. Sosial şəbəkədən istifadə mədəniyyəti, məlumatların çatdırılması tərzi və s. istiqamətdə elmi əsaslarla fəaliyyət proqramları hazırlanmalı və həyata keçirməlidirlər”.
Ani baş verən hadisələr zamanı cəmiyyətdə yaradılan gərginliyin xaricdən süni şəkildə idarə olunması iddialarına gəlincə, Ə.Qəşəmoğlu vurğulayıb ki, belə hallar mümkündür:
"Qeyd etdiyim kimi, həm ölkənin daxilində, həm də xaricdə yaranmış vəziyyətdən istifadə edən qüvvələr olur. Bu, tək Azərbaycana aid deyil. İnkişaf etmiş dövlətlərdə belə analoji hallar yaşanır. Ona görə, situasiya elə qurulmalıdır ki, pozuculuq yaratmaq istəyən qüvvələrin əlində əsas olmasın”.
Qeyd edək ki, iyulun 2-dən 3-nə keçən gecə Mingəçevir şəhərində fəaliyyət göstərən ölkənin ən böyük elektrik stansiyası olan Azərbaycan İES 6-cı enerji blokunda partlayış baş verib və yanğın olub. Bundan sonra paytaxtda və ölkənin əksər rayonlarında elektrik enerjisinin verilməsi dayandırılıb. Vəziyyət bərpa olunsa da, elektrik enerjisinə bağlı olan paytaxtın su təchizatında və "Bakı Metropoliteni”nin fəaliyyətində fasilələr yaranıb. Nəticədə ötən gündən etibarən mətbuatda və sosial şəbəkələrdə müxtəlif fikirlər səsləndirilir, əsası olmayan iddialar ortaya atılır. Bütün bu proseslər cəmiyyətdə bir qədər gərginlik yaranmasına gətirib çıxarıb.
Aysel Aslan
