"Girovlarla bağlı məsələnin gündəmdə saxlanması, mütəmadi informasiyaların yayılması ümumi baxımdan yaxşı prosesdir”.
Bunu "Sherg.az”a hüquq müdafiəçisi Səadət Bənənyarlı deyib.
S.Bənənyarlı bildirib ki, proseslə əsasən Beynəlxalq Qızıl Xaç Komitəsi məşğul olur və girovların ailəsi ilə əlaqə saxlayırlar:
"Bilirsiz ki, zaman-zaman girovların dəyişdirilməsi məsələsi müzakirə olunur. Ancaq bu məsələ yüksək diplomatik danışıqlar müstəvisində və Komitə tərəfindən reallaşdırıla bilər. Bizim edə biləcəyimiz isə prosesi daim diqqət mərkəzində saxlamaqdır. Əgər girovların qarşılıqlı dəyişdirilməsi baş tutsaydı, çox gözəl olardı. O zaman təkcə Şahbaz Quliyevin deyil, Dilqəm Əsgərovun da taleyi müsbət həll olunardı”.
Qeyd edək ki, Kəlbəcərdə ermənilər tərəfindən girov götürülən Şahbaz Quliyevin video-görüntüləri ötən gün ailəsinə təqdim olunub. Bu barədə girovun qardaşı İlham Quliyev məlumat verib. Bildirib ki, Şahbazın yeni görüntüləri onlara 15 gün əvvəl Beynəlxalq Qızıl Xaç Komitəsinin nümayəndələri tərəfindən göstərilib: "Şahbazın videosunu görəndən bəri özümüzə gələ bilmirik. İstəyirik, xalqımız onun nə vəziyyətdə saxlanıldığını görsün, halına acısın. Videoya baxanda ürəyimiz qan ağladı. Qardaşım yaman günə qalıb”.
İsmayıl
