Parlamentin yaz sessiyasi bitdikdən sonra növbədənkənar sessiya da artıq başa çatıb. Bu da deputatların istirahət vaxtının çatması deməkdir.
Millət vəkillərinin istirahəti həmişə ictimaiyyətin maraq dairəsində olduğundan "Şərq” qəzeti olaraq onların harada və necə istirahət edəcəkləri ilə bağlı sorğu keçirdik.
Deputat Fazil Mustafa istirahətini ölkəmizdə etməyi planlaşdırır:
"Xəzər dənizinin sahilindən gözəl yer tanımıram. Ona görə də kənar yerdə istirahətlə bağlı heç bir planım yoxdur. Ola bilər ki, təsadüfən xaricə gedim, amma istirahətim adi qaydada Bakıda olacaq”.
Millət vəkili, akademik Nizami Cəfərov harada istirahət edəcəyini hələ dəqiq bilmədiyini deyir:
"Əlbəttə, yay aylarında bizim də dincəlməyə ehtiyacımız var. Əvvəllər buna ehtiyac yox idi, amma indi yaş artdıqca, belə bir istirahətin lazımlı olduğunu görürəm. Harada istirahət edəcəyimi bu ayın ortalarından sonra dəqiqləşdirəcəm. Ailədə də fikirləşirlər, hara məsləhətli olsa, orada da dincələcəyik”.
Millət vəkili Aqil Abbas da istirahətini ölkəmizdə edəcəyini dedi: "Çox güman ki, istirahətimi Lerikdəki "Relaks” adlı istirahət mərkəzində edəcəm. Çox gözəl istirahət mərkəzidir, Türkiyədən heç geri qalmır, həm də qiymətləri münasibdir. Hər il ailəvi olaraq orda istirahət edirik. Ordan da digər bölgələrə gedirəm. Ola bilər ki, ölkədən də kənara çıxım. Əgər pulum çatsa, yəqin ki, xaricə də gedəcəm”.
Deputat Zahid Oruc ölkədən kənara çıxmayacağını bildirdi:
"Yaxşı istirahət etmədikdə yüksək səviyyədə çalışmaq imkanları da aşağı olur. Yayda istənilən ölkədə məmur fəaliyyətində və idarəetmənin digər sektorlarında çalışmaq insanlar üçün bir qədər çətinləşir. Düşünürəm ki, Azərbaycanın coğrafiyası istirahət üçün çox yaxşı imkanlara malikdir. Ona görə də xarici ölkəyə getməyəcəm, Azərbaycan daxilində istirahətlə bağlı planlarımız var. Müəyyən qayğılarım var, İnşallah, bunları yoluna qoyandan sonra istirahətimi edəcəm”.
Millət vəkili Elman Məmmədov xarici ölkədə istirahət etməyəcəyini dedi: "Azərbaycanı hər yerdən üstün bilirəm. Ölkəmizin görməli, gəzməli və istirahət eləməli o qədər yerləri var ki, bir ömür keçsə də, gəzib qurtara bilmirsən. Bütün məzuniyyətim boyu ancaq Azərbaycanda oluram, kənar yerə getmirəm”.
Millət vəkili Aydın Mirzəzadə və Fəzail İbrahimli də ölkəmizdə istirahət edəcəklərini bildirdi.
Yeganə Bayramova
