"Zaman-zaman təqsirləndirilən şəxslər, onların yaxınları tərəfindən icra məmurlarına qarşı hücumlar olduğuna görə, icra məmurlarının silahdan istifadəsinə icazə verilir”.
Bunu "Sherg.az”a "İcra məmurları haqqında” qanunun 8-ci maddəsinə - İcra məmurlarının hüquqlarına dəyişiklik edilməsindən danışarkən "Konstitusiya” Araşdırmaları Fondunun rəhbəri Əliməmməd Nuriyev söyləyib.
O bildirib ki, nəzəri baxımdan icra məmurlarının silahdan sui-istifadə halları mümkün ola bilər:
"Halbuki, qanunvericilikdə aydın şəkildə silahdan istifadə halları müəyyənləşdirilib. Silahın istifadəsi üçün aydın meyarlar var. Ona görə, icra məmurlarının silahdan sui-istifadə edəcəyini düşünmürəm. İndiyə qədər silahdan şəxsi məqsədlər üçün istifadə edilməsi halları cəmi bir neçə dəfə baş verib. Digər bütün hallarda silah adekvat vəziyyətlərdə, icra məmurunun həyatına təhlükə olanda, silahlı şəxslərlə, qatı cinayətkarlarla qarşılaşanda silah istifadə olunub. Qanunvericilikdə silahdan istifadənin hədləri də müəyyənləşib. Xüsusilə müvafiq bilgilərin verilməsi, məlumatlandırılmanın aparılması təmin edilməlidir.
Silahdan istifadəyə icazənin verilməsi o demək deyil ki, kim necə gəldi silah işlədə bilər. Bir müddət əvvəl bir çox vəzifə sahiblərinə silahdan istifadəyə icazə verilsə də, əksəriyyət bundan imtina etdi. Ona görə, indiki şəraitdə də Azərbaycanda silah verilən şəxslərin dairəsi məhduddur. Həmçinin, silahdan istifadə qaydaları konkret müəyyənləşdiyindən sui-istifadə hallarının baş qaldıracağı ilə bağlı heç bir narahatlıq keçirməyə ehtiyac yoxdur”.
Qeyd edək ki, dəyişikliyə əsasən qanuna probasiya xidməti icra məmurunun Azərbaycan Respublikasının Cəzaların İcrası Məcəlləsi və İnzibati Xətalar Məcəlləsi ilə müəyyən edilən hüquqları ilə yanaşı, aşağıdakı hüquqları vardır:
1. Fəaliyyət istiqamətlərinə uyğun olaraq dövlət qurumlarına hüquqi və fiziki şəxslərə müraciət etmək, sorğular vermək və arayış almaq;
2. Üzərində probasiya nəzarəti həyata keçirilən, lakin oldğu yeri müəyyən edilməyən şəxslərin axtarılması ilə əlaqədar onların yaşayış yerlərinə daxil olmaq, orada baxış keçirmək və ehtimal olunan gizlənə biləcəyi bütün saxlama yerlərini açmaq və baxmaq;
3. Polis və təhlükəsizlik orqanlarının köməyindən istifadə etmək;
4. Qanunla nəzərdə tutulmuş qaydada və hallarda fiziki güc, xüsusi vasitə və xidməti silahı tətbiq etmək.
Aysel Aslan
