Bu günə qədər işğaldan azad edilən ərazilərdə 16 partlayış olub ki, hər birində də ölüm faktı qeydə alınıb.
Bu sözləri “Report”un “Hüququnuz var” verilşində Daxili İşlər Nazirliyinin Kütləvi İnformasiya və İctimaiyyətlə Əlaqələr Şöbəsinin rəisi, polis mayoru Elşad Hacıyev deyib. O bildirib ki, həmin ərazilərdə tarixi abidələrin, su hövzələrinin, yaşayış binalarının, hətta meyvə ağaclarının altı belə minalanmış vəziyyətdədir:
“Bu, çox ciddi təhlükədir. Bu günə qədər 1400 nəfərdən artıq şəxs işğaldan azad edilən ərazilərə qanunsuz keçməyə cəhd edərkən saxlanılıb və barələrində inzibati tədbir görülüb.
Onların içərisində 20-dən artıq şəxs var ki, müxtəlif vaxtlarda onlar polis əməkdaşları tərəfindən saxlanılaraq, barəsində məhkəmə qərarı ilə inzibati həbs tədbiri seçilib, lakin islah olunmayıb. Bəziləri isə həmin ərazilərə keçib və minaya düşərək həyatını itirib”.
E.Hacıyev onu da qeyd edib ki, biz ümid edirik ki, yaxın zamanda əhali doğma torpaqlarına qayıtsınlar:
“Dövlətimiz bu istiqamətdə əlindən gələnləri edir. Dövlət əhalinin tezliklə həmin ərazilərə sağlam şəkildə qaytarılmasında maraqlıdır. Sadəcə olaraq əhalidən bir qədər təmkinli, səbrli olmalarını istəyirik”.
