"Türkiyə, Almaniya, Fransa və Rusiyanın İstanbulda Suriya məsələsi fonunda bir araya gəlməsini formal görüş kimi dəyərləndirirəm”.
Bunu "Sherg.az”a politoloq Sədrəddin Soltan bildirib.
Onun sözlərinə görə, Suriya probleminin həll olunması ilə bağı bu tip görüşlərin keçirilməsi, dünya güclərinin bir araya gəlib, ortaq bəyanatlar qəbul etməsi, müzakirə aparması yaxşı haldır:
"Amma bu görüşün Suriya probleminə müsbət təsir edəcəyini düşünmürəm. Çünki ABŞ kimi nüfuz sahibi olan bir dövlətin görüşdə iştirak etməməsi bu prosesə xeyir gətirməyəcək. Hesab edirəm ki, Fransa, Almaniya, Türkiyə və Rusiyanın Suriya məsələsinin həlli yolunda bir araya gəlib, görüş keçirməsi Avropa İttifaqının ABŞ-a qarşı özünəməxsus təzyiqidir.
Çünki ABŞ Avropa İttifaqına o cümlədən Almaniyaya məsələ ilə bağlı müəyən mesajlar verir. Fransa və Almaniya Suriya məsələsini bəhanə gətirərək Türkiyə və Rusiya ilə yaxınlaşır. Digər tərəfdən Aİ-nin bu aparıcı iki dövləti Suriyalı və İraqlı qaçqınlarla bağlı müəyyən problemlər yaşayırlar. Və bu məsələni həll etmək lazımdır. Aİ ümumiyyətlə Suriya, İraq məsələsində gördüyü yeganə iş mühacirləri qəbul etməkdir. Bundan başqa elə bir ciddi uğurları olmayıb. Amma indi çalışırlar ki, bu məsələni həll etsinlər, özlərinə məxsus formada ABŞ-a mesaj versinlər.Lakin bu proseslə bağlı real addımların atılacağına inanmıram".
Qeyd edək ki, oktyabrın 27-də İstanbulda Türkiyə, Rusiya, Fransa və Almaniya dövlət və hökumət başçılarının iştirakı ilə Suriya sammiti keçirilib. Suriyadakı hərbi-siyasi vəziyyət, münaqişənin həlli yolları, eləcə də ölkənin bərpası mövzularının ələ alındığı ali toplantıda Ərdoğan, Putin, Makron və Merkellə yanaşı BMT-nin Suriya üzrə xüsusi təmsilçisi Stefan de Mistura da iştriak edib.
Kənan Eynuroğlu
