"Ölkə başçısının Mingəçevir İES-də baş verən qəzanın nəticələrinin aradan qaldırılmasında vətəndaşların rolunu qiymətləndirməsi, həmrəylik nümayiş etdirən şəxslərə təşəkkür etməsi yüksək qiymətləndirilir”.
Bunu "Sherg.az”a kulturoloq Aydınxan Əbilov söyləyib.
O qeyd edib ki, ölkə başçısının problemə yaxından diqqət göstərməsi, detalları ilə maraqlanması insanların rahatlığının təmin olunmasına böyük önəm verdiyini göstərir:
"Prezident İlham Əliyevin fikri ilə razıyam ki, vətəndaşlar həmrəylik göstərdi. Bu birlik Azərbaycan xalqında var və müxtəlif hadisələrə reaksiya zamanı nümayiş olunur. Sadəcə xalqın mütəşəkkilliyi bir qədər ağır günlərdə, problemli məsələlərdə özünü göstərir. İnanıram ki, düşmən üzərində qələbəmizdə də bu mütəşəkkilliyi görəcəyik.
Daha öncə də qeyd etdiyim kimi, ictimai beyin mərkəzlərinin nəzdində antiböhran halları ilə məşğul olan təşkilatlar yaradılmalıdır. Bu təşkilatlar da böhranın idarə edilməsinə dəstək göstərməlidir. Əslində belə gözlənilməz hadisə zamanı insanların panikaya düşməməsi, əksəriyyətin dövlətin, xalqın yanında olması, qurumların yüksək fəaliyyəti nümunə idi.
XXI əsrdə analitiklərin də qeyd etdiyi kimi, texnoqəzaların baş verdiyi dövrdə yaşayırıq. Sistemli şəkildə cəmiyyətin və müxtəlif qrupların birliyinə böyük ehtiyac olacaq”.
Qeyd edək ki, iyulun 3- ü gecə saatlarında Mingəçevir şəhərində fəaliyyət göstərən ölkənin ən böyük elektrik stansiyası olan Azərbaycan İES 1-ci və 6-cı enerji blokunda partlayış baş verib. Bundan sonra ölkə ərazisində elektrik enerjisinin təmin olunmasında problemlər yaranıb.
İyulun 4-də müxtəlif qurumlar üzrə səlahiyyətli şəxslərin iştirakı ilə müşavirə keçirən Prezident İlham Əliyev toplantıda çıxışı zamanı Azərbaycan vətəndaşlarının bu məsələ ilə bağlı böyük məsuliyyət, böyük vətəndaş həmrəyliyi göstərdiklərini qeyd etdi. Prezident vurğuladı ki, bütövlükdə Azərbaycan cəmiyyəti bu çətin sınaqdan şərəflə çıxa bildi:
"Bütün Azərbaycan vətəndaşlarına göstərdikləri dəstəyə, anlayışa və vətəndaş həmrəyliyinə görə təşəkkür edirəm. Azərbaycan cəmiyyəti çox yetkin cəmiyyətdir və Azərbaycanda, sözün əsl mənasında, vətəndaş həmrəyliyi mövcuddur”.
Aysel Aslan
