Mətbuat Şurasının sədri, millət vəkili Əflatun Amaşov parlamentin ötən gün keçirilən iclasında bəzi ailələrdə uşaqlara dini xurafatın aşılandığını deyib. "Uşaqların zərərli informasiyadan qorunması haqqında” qanun layihəsinə "dini xurafat” anlayışının əlavə edilməsini təklif edən deputat vurğulayıb ki, uşaqlara dini xurafatın aşılanması sonradan özünü zərərli şəkildə büruzə verə bilər: "Məktəblərdə "Həyat bilgisi” dərsinin keçirilməsi müsbət haldır. Sözügedən dərslikdə İslam dini haqqında düzgün məlumatlar aşılanır". Daha sonra çıxış edən millət vəkili Qənirə Paşayeva da qanun layihəsi haqqında müsbət fikirlərini bildirib. O qeyd edib ki, məktəblərdə uşaqlar maarifləndirilməli, onlara zərərli informasiyalardan qorunmağın yolları öyrədilməlidir: "Burada valideynlər də uşaqları ilə yaxından maraqlanmalıdır”.
Deputatın təklifi ilə bağlı "Şərq”ə açıqlama verən ilahiyyat üzrə fəlsəfə doktoru Rəşad Məmmədov da hesab edir ki, uşaqlara orta məktəbdə dini xurafat əleyhinə dolğun məlumat verilməlidir:
"Azərbaycanın tolerantlığı, din-dövlət münasibətlərində yaranan münasibətləri bəzi qüvvələr istəmir. Daim ölkəmizə dini zəmində qara əllər uzansa da, qərəzli dairələr Azərbaycandakı dövlət-din münasibətlərinə xələl gətirə bilməyiblər. Buna baxmayaraq, uşaqlarımızı dini xurafatdan uzaq tutmaq üçün orta məktəblərdə səmərəli işlər görülməlidir. Cənab Prezidentin təşəbbüsü ilə yaradılan İlahiyyat İnstitutuna daxil olmaq istəyən şagirdlərin öncədən dinlə bağlı ilkin məlumat sahibi olmaları çox müsbət olardı. Təəssüflər olsun ki, bir çox ailələrdə dini bilgilər, mənəvi dəyərlər yox dərəcəsindədir, yaxud da bilgilər xurafat və radikal formadadır. Bunların qarşısını almaq üçün təlim-tərbiyə və təhsili gücləndirmək vacib məsələdir”.
İsmayıl
