"Fikrimcə, molla ölümü, xüsusən də intiharı aşılamır uşaqlarda. Axı bütün din xadimləri deyir ki, həm İslamda, həm da digər dinlərdə intihar etmək günahdır".
Bu barədə "Sherg.az"a molla yanına gedən şagirdin "Peyğəmbərin yanına gedirəm" deyib intihar etməsindən danışarkən sosioloq Lalə Mehralı bildirib.
Onun sözlərinə görə, htta iddia edilir ki, intihar edənin bütün yaxşı əməlləri silinir, cənnətdən uzaqlaşdırılır:
"Yəni din adamları belə deyir. Əgər onlar Peyğəmbərin cənnətdə olduğunu və intiharın günah olduğunu deyirlərsə, onda uşaqlara inttiharın günahlarını və nəticələrini də öyrədirlər. Həmin uşağın dərs aldığı molla nə qədər dini biliyə sahibdir, hansı dərəcədə ruhi bilik aşılayır, onu bilmirəm.
Əgər bu molla din adamı deyil, fırıldaqçı, əməlbaz biridirsə o zaman şübhə yeri qalır. Amma mən yazıb qoyduğu məktubdan belə anladım ki, molla uşaqlara peyğəmbərin cənnətdə olduğundan danışıb və ordakı həyatı təsvir edib. Ola bilsin o nağılvari həyat uşağa cəzbedici gəlib və uşaq ağlı ilə ora getmək istəyib. Hər bir halda araşdırmaq lazımdır.
Amma bir məqam da diqqətimi çəkdi ki, qurban olaraq Tanrıya təklif edilmiş İsmayıla qarşı uşaqda rəğbət olub. Bu da müəmmalı tərəfidir hadisənin. Niyə məhz İsmayıl? Əli, Hüseyn, Məhəmməd də yaza bilərdi, amma qurban deyilmiş İsmayıl yazıb. Bu da şübhəlidir. Bütün hallarda bu yaşda uşaq məktəb əvəzinə din öyrənməyə getməməlidir. Dini bilik öyrənmənin yaşı və zamanı var. Nəzər alsaq ki bizim din xadimləri ruhi bilik yerinə qorxu, cahillik aşılayırlar, onda onların uşaqlara öyrədəcəyi faydalı nəysə olmaz"
Qeyd edək ki, Ağdaş rayonunda özünü asan 12 yaşlı məktəblinin yazdığı məktub tapılıb. Xəbərə görə, rayonun Ləki qəsəbə sakini, 2005-ci il təvəllüdlü Adıgözəlov İsmayıl Çingiz oğlu yaşadığı evin həyətindəki tövlədə özünü kəndirlə asaraq intihar edib. Hadisədən gec xəbər tutan valideynləri onun meyitini müayinə üçün Respublika Tibbi Ekspertiza və Patoloji Anatomiya Birliyinin Ağdaş rayon şöbəsinə təhvil veriblər.
Bir neçə aydır ki, dərsdən sonra "Quran” oxumağı öyrənmək üçün kənddəki mollanın yanına gedən İsmayıl Adıgözəlovun intihardan öncə yazdığı məktub tapılıb. Məktubda bunlar qeyd edilib: "Peyğəmbərimin yanına gedirəm. Mənə görə bacımın toy mərasimini ləngitməyin. Bacımın oğlu olsa İsmayıl, qızı olsa Zəhra adı verin”. İntiharın səbəbi məlum deyil. Uşağın psixoloji problemlərinin olmadığı, məktəbdə dərslərini yaxşı oxuduğu bildirilir.Faktla bağlı Ağdaş rayon Prokurorluğu tərəfindən araşdırma aparılır.
Ayyət Əhməd
