"Mingəçevir İES-də baş verən qəza ilə əlaqədar yaradılmış komissiyanın araşdırması yekunlaşmadan problemin səbəbləri, günahkarların məsuliyyətə cəlb olunması barədə konkret fikir bildirmək çətindir”.
Bu barədə "Sherg.az”a vəkil İradə Cavadova məlumat verib.
O bildirib. ki, toplanmış materiallar dəqiq analiz edildikdən sonra məsələyə hüquqi qiymət verilə bilər:
"Təbii ki, ölkədə enerji təminatının dayanması yaxşı hadisə deyil. Ona görə, məsələ araşdırılıb, hüquqi qiymət verilməsi mütləqdir. Bu hadisə bir daha göstərdi ki, nöqsanlar var. Bu nöqsanlar isə tam araşdırmadan sonra dəqiq səsləndirilə bilər. Kütləvi İnformasiya Vasitələrində müxtəlif fikirlər səsləndirilir ki, yeyinti halları, məsuliyyətsizlik faktı olub. Amma bütün bunlar hələlik ehtimallardır. Ölkə başçısının tapşırığı ilə yaradılan Dövlət Komissiyası əhatəli araşdırma aparıb, nəticələri ortaya qoyduqdan sonra əsassız fikirlərə son qoyulacaq.
Bir məsələni xüsusi qeyd etmək istərdim ki, baş verən hadisənin fəsadları tez bir zamanda aradan qaldırıldı. Operativ müdaxilə və enerjinin bərpası çox müsbət hal oldu. Çünki insanlar vəziyyətin 2-3 gün davam edəcəyi fikri ilə təşvişə düşmüşdülər. Amma belə irimiqyaslı problemin tez bir zamanda aradan qaldırılması əhalidə bir qədər inam yaratdı. Hadisənin kökündə duran səbəblər isə komissiyanın müəyyən edəcəyi məsələdir”.
Qeyd edək ki, iyulun 4-də keçirilən müşavirədə Prezident İlham Əliyev stansiyada baş verən qəzanın lokal xarakter daşımalı olduğunu söyləyib. Prezident bildirib ki, çox ciddi araşdırmalar aparılmalı, günahkarlar məsuliyyətə cəlb edilməlidir:
"Bir daha qeyd etmək istəyirəm, elə bir tədbirlər planı hazırlanmalıdır ki, gələcəkdə biz bu qəzalardan və qəzaların törədə biləcəyi fəsadlardan özümüzü qoruya bilək”.
Aysel Aslan
