Nikolun siyasi naşılığı, yalan vədləri, seçkilərdə qalib gəlmək şansını azaldıb
"Ermənistanın baş naziri vəzifəsini icra edən Nikol Paşinyana qarşı etiraz hərəkətləri getdikcə genişlənir”. Bunu "Şərq”ə açıqlamasında analitik Ehtiram Aşırlı deyib. Düşmən ölkədəki gərgin vəziyyəti dəyərləndirən politoloq bildirib ki, indiyədək bu etirazlar əsasən ayrı-ayrı şəxslər və ya siyasi qüvvələr tərəfindən edilirdisə, hazırda narazılıqlar əhali arasında da geniş yayılmaqdadır: "Bir müddət əvvəl "Nairit” zavodunun əməkdaşları 7 aylıq maaşlarının ödənməsi tələbi ilə hökumət binası qarşısında etirazlar təşkil etmişdilər. Ötən gün həmin zavodun yüzlərlə işçisi yenidən eyni məkanda etiraz mitinqi keçiriblər. Bu dəfə də tələb dörd aydır gecikən maaşların verilməməsi olub.
Lakin onlar siyasi şüarlar da səsləndiriblər və Paşinyanı verdiyi vədləri yerinə yetirməyə çağırıblar. Göründüyü kimi, artıq etirazlar sosial xarakter daşımaqdan kənara çıxır və daha çox siyasi müstəviyə keçir. Bir neçə gündür, Ermənistanın Berdavan kəndinin sakinləri Azərbaycanda əsir saxlanılan erməni kəşfiyyatçı Karen Kazaryanın azad edilməsi tələbi ilə piketlər keçirirlər. Etirazçıları özündən çıxaran isə hökumətin cavabı yox, məhz Paşinyanın fikirləri olub. Baş nazir vətəndaşlara qarşı çox sərt sözlər işlədib və onları "Azərbaycanın maraqlarına xidmət etməkdə” günahlandırıb. Bu isə öz növbəsində etirazçıları daha da qızışdırıb və onlar da Paşinyandan həm üzr istəməyi, həm də vədlərinə əməl etməyi tələb etməyə başlayıblar”.
Politoloq bildirib ki, Ermənistan baş nazirinin müavinləri Ararat Mirzoyan və Tiqran Avinyan kəşfiyyatçı Karen Kazaryanın əsirlikdən azad edilməsi tələbi ilə kənddə keçirilən etiraz aksiyalarını sərt şəkildə tənqid ediblər. Paşinyan isə noyabrın 20-də jurnalistlərə verdiyi açıqlamada hökumətin bununla bağlı mövqeyini dəstəklədiyini bildirib: "Problem təkcə bunlarla məhdudlaşmır. Ölkədə siyasi vəziyyət gündən-günə ağırlaşır və Paşinyana qarşı ittihamların ardı-arası kəsilmir. Müşahidəçilər belə vəziyyətdə onun 9 dekabr seçkilərində qalib gəlmə ehtimalının getdikcə zəiflədiyini bildirirlər. Məsələ burasındadır ki, Paşinyan siyasi naşılığı və məsuliyyətsiz çıxışları ilə insanlar arasında reytinqini sürətlə "xərcləyir”. Opponentləri onu yalançılıqda və ölkəni xaosa sürükləməkdə günahlandırırlar. Ermənistan müdafiə nazirinin sabiq müavini, parlamentin xarici siyasət daimi komissiyasının keçmiş sədri Artak Zakaryan mətbuata açıqlamasında bildirib ki, Paşinyan Dağlıq Qarabağ münaqişəsi ilə bağlı danışıqların məsuliyyətindən də yayınmağa çalışır”.
Ekspert vurğulayıb ki, Paşinyanın komandasında narazılıqların yaranması barədə də söhbətlər yayılır:
"Yerli ekspertlərin fikrincə, Paşinyan müdafiə naziri David Tonoyanın fəaliyyətindən narazıdır. Onun son günlər ordudakı acınacaqlı vəziyyətlə bağlı söylədikləri də bununla izah edilir. Hesab edilir ki, Paşinyan Tonoyanın ordudakı vəziyyətin yaxşı olması barədə indiyədək dediklərinin yalan olduğunu ictimailəşdirməklə onun fəaliyyətindən narazı qaldığını ifadə edib”.
İsmayıl
