Ona görə Ermənistanda islahatlar birbaşa Qarabağ münaqişəsinin həlli prosesi ilə aparılacaqsa, müsbət irəliləyiş olacaq
"Ermənistanın baş naziri Nikol Paşinyan istefa verməklə, inqilabın birinci mərhələsini sona çatdırdı. İkinci mərhələdə Paşinyan kütləyə verdiyi vədləri həyata keçirməli və islahatlara başlamalıdır”.
Bunu "Şərq”ə açıqlamasında politoloq Məhəmməd Əsədullazadə deyib. Paşinyanın seçki öncəsi istefasını dəyərləndirən analitik bildirib ki, əgər, baş nazir yenidən öz fəaliyyətini populist çıxışlara və Koçaryana qarşı mübarizəyə həsr edəcəksə, onda əhali yenidən meydanlara çıxacaq:
"Bu isə sabiq prezident Robert Koçaryanın yenidən toparlanmasına, Paşinyana hücuma keçməsinə əsas olacaq. Koçaryan çalışacaq ki, Paşinyana qarşı dirəniş göstərsin və ölkədə islahatlar aparılmasın. Paşinyan 6 ay müddətində fəaliyyətini "Qarabağ klanı"nı zərərsizləşdirməyə, dövlət institutlarında köhnə hakimiyyətin mənsublarını vəzifədən uzaqlaşdırmağa həsr etdi. Eyni zamanda bu müddət ərzində ölkədə inqilabi əhval-ruhiyyəni sürdürdü və Sarkisyanın parlament hakimiyyətini zəiflətdi.
Həmçinin, İrəvanda mer seçkilərində qalib gələrək, Respublika Partiyasını pat vəziyyətə saldı. Ancaq baş nazir nə daxili, nə də xarici siyasətdə mühüm addımlar ata bilmədi. İqtisadi və sosial vəziyyət barədə verdiyi sözlər, elə söz olaraq qaldı. Paşinyan sadəcə iki məsələdə irəliləyiş əldə etdi. Birincisi, növbədənkənar parlament seçkilərinin keçirilməsinə nail oldu, ikincisi isə Qarabağ münaqişəsinin həlli üzrə Prezident İlham Əliyevlə görüşmək şansı əldə etdi.
Əslində hər iki faktor Paşinyana imkan verəcək ki, inqilabın ikinci mərhələsində islahatlara getsin. Təbii ki, bu islahatlar birbaşa Qarabağ münaqişəsinin həlli prosesi ilə aparılacaqsa, müsbət irəliləyiş olacaq. Yox əgər Paşinyan hökuməti substantiv danışıqlardan qaçarsa, o zaman Azərbaycan hərbi gücə üstünlük verəcək. Bu da Paşinyanın reytinqinə və islahatlarına zərbə vuracaq”.
İsmayıl
