Badamdar qəsəbəsindəki 6 hektarlıq ərazidə çəkilən hasarlar, ekskavator vasitəsi ilə sökülür. Buna səbəb həmin ərazidə tikintinin qanunsuz formada aparılmasıdır. Ərazidə çoxlu sayda yaşayış evləri də tikilib ki, onların da bəzilərinin sahiblərinə sənədlərinin saxta olduğu bildirilib.
Sakinlərin sözlərinə görə isə həmin ərazidə qeyri-qanuni tikintinin aparılması mümkün deyil. Çünki icra hakimiyyətinin əməkdaşları mütəmadi olaraq əraziyə nəzarət edir. Buradakı tikintilərin əksəriyyəti də bələdiyyə sənədi ilə aparılıb.
Səbael Rayon İcra Hakimiyyətinin sektor müdiri Metin Hüseynov isə açıqlamasında deyib ki, belə qanunsuz tikintilər əvvəlki rəhbərliyin dövründə aparılıb və həmin ərazilərdə yoxlamanın aparılmasına yeni qərar verilib.
"Konstitusiya” Araşdırmalar Fondunun prezidenti Əliməmməd Nuriyev "Şərq”ə deyib ki, qanunsuz evlərin tikilməsi icra başçılarının məsuliyyətsizliyinin nəticəsidir: "Hər hansı bir ərazidə tikintinin həyata keçirilməsinə yerli icra hakimiyyəti nəzarət edir. Bu orqanın razılığı olmadan ərazidə hər hansı tikili aparmaq mümkün deyil. Sözügedən ərazidə qanunsuz tikililər varsa, deməli müvafiq icra hakimiyyəti diqqət yetirməyib. Yəni ortada ya səhlənkarlıq, ya da səlahiyyətlərdən sui-istifadə halları var. Tikinti bir gecənin işi deyil axı aidiyyəti qurumun xəbəri olmasın. Bu proses aylarla, bəzən də illərlə davam edir. Heç bir vətəndaş icra nümayəndəliyindən razılıq almadan iki daşı üst-üstə qoymaz. Deməli, indi qanunsuz hesab edilən tikililərin hamısına razılıq elə icra hakimiyyətinin özündən alınıb”.
Ə.Nuriyevin sözlərinə görə, evlərin sökülməsi, əhalinin əşyalarının çölə atılmasına, istənilən texniki işin icrası üçün məhkəmə qərarı olmalıdır. Evi sökülən vətəndaş məhkəmənin qərarını tələb etməlidir, əraziyə cəlb olunmuş polislər də. Məhkəmə qərarı yoxdursa, evin sökülməsi qanunsuzdur. İndi vəziyyət elədir ki, qeydiyyatsız evlərin sökülməsi zamanı bəzən sui-istifadə hallarına da yol verilir. Məhkəmələr ciddi araşdırma aparmadan evin sökülməsi qərarını çıxarır. 50 il əvvəl tikilmiş evi sökürlər. Halbuki hüquq-mühafizə orqanları qanunsuz tikili ucaldılarkən buna imkan verməməlidir. Amma bizdə tərsinədir. Ev tikilir, içində illərlə yaşayırlar, ertəsi gün isə gəlib deyirlər ki, qanunsuz yaşayırsınız. Vətəndaşlar belə hallarda öz mülkiyyət hüquqlarını sonadək müdafiə etməlidir. Bütün dünyada vətəndaşın mülkiyyət hüququ toxunulmaz hesab edilir. Bizdə də beynəlxalq hüquq normalarına riayət edilməlidir. Yəni vətəndaşlar bu məsələdə Avropa Məhkəməsinədək gedib çıxa bilər və bütün hallarda məhkəmə onların xeyrinə qərar çıxaracaq.
Əgər obyekt və ya ev milli təhlükəsizliklə bağlı məsələlərdə, müdafiə qurğularının tikilməsinə görə və yaxud da kommunikasiya şəbəkəsinin ərazisinə düşürsə belə, həmin torpaq sahələri dövlət tərəfindən vətəndaşlardan alına bilər. Bu zaman da, şübhəsiz ki, ədalətli kompensasiya hüququ təmin edilməlidir”.
Hüquq müdafiəçisinin sözlərinə görə, heç bir halda vətəndaşlar müvafiq icra hakimiyyətlərinin səhlənkarlığının cəzasını çəkməməlidir. "Əvvəlki rəhbərlik elə edib, biz də belə edirik deməklə iş bitmir. Biz hüquqi dövlətdə yaşayırıq və hər bir məmur da qanunlara riayət etmək məcburiyyətindədir.
Şəymən
