"Dağlıq Qarabağ münaqişəsinin həlli istiqamətində aparılan danışıqlar zamanı tərəflər və həmsədrlər masa arxasına əyləşdikdə məlum olur ki, hər tərəfin öz şərti var”.
Bunu "Sherg.az”a Avropa İttifaqının diplomatiya rəhbəri Federika Moqerininin "Dağlıq Qarabağ münaqişəsinin tərəfləri ilkin şərtlər olmadan danışıqlara başlamalıdırlar " bəyanatını şərh edərkən politoloq Zərdüşt Əlizadə söyləyib.
O diqqətə çatdırıb ki, Ermənistan tərəfinin şərti qondarma Dağlıq Qarabağın münaqişə tərəfi kimi qəbul edilməsidir:
"Bu isə Azərbaycanın heç zaman qəbul etməyəcəyi məsələdir. Çünki qondarma Dağlıq Qarabağın heç bir müstəqil qüvvəsi yoxdur. "Dağlıq Qarabağ” Ermənistanın, Ermənistan isə Rusiyanın alətidir. Heç bir siyasi iradəsi, resursları olmayan qüvvəni Azərbaycan Respublikası ilə danışıqlara əyləşdirmək istəyirlər. Onlar da buna görə, beynəlxalq hüquqa zidd olan şərtlər irəli sürürlər. Rusiya özünü vasitəçi, sülhpərvər göstərməyə çalışsa da, işğalçı qüvvələri dəstəkləyir və bu münaqişə vasitəsilə onlara öz iradəsini qəbul etdirir.Avropa İttifaqının isə danışıqlarda rol oynayacağını düşünmürəm. Sadəcə, Aİ-nin imkanlarını düzgün qiymətləndirmək lazımdır. Bu təşkilat iqtisadi cəhətdən nəhəngdir, amma siyasi baxımdan kiçikdir”.
Qeyd edək ki, F. Moqerini Azərbaycan və Ermənistan XİN rəhbərlərinin görüşü əsnasında Dağlıq Qarabağ münaqişəsinin sülh yolu ilə həllini bir daha dəstəkləyib:
"Bu kontekstdə tərəflərin Minsk Qrupunun həmsədrlərinin himayəsi altında ilkin şərtlər olmadan tam şəkildə danışıqlarda iştirak etməsi son dərəcə vacibdir".
Aysel Aslan
