“Sevgi nə qız uşağına, nə varlıya, nə kasıba, nə də tərbiyəsiz qadın olmağa baxır. Pozğun qadını da sevmək olur, dilənçiyə də aşiq olmaq olar”
Müğənni Tacir Şahmalıoğlunun bir zamanlar duet ortağı olan həmkarı Fədayə Laçınla münasibətləri yenidən gündəmə gəlib. Sənətçi illər əvvəl duet ortağı ilə sevgili olduğunu danıb. O bildirib ki, Fədayə ilə sevgili olmayıb: "Mənim ailəm, balalarım var. Ailəmin bir tükünü milyon insana dəyişmərəm. Duet ortaqlığı belədir ki, biz məcburən bir yerdə olurduq.
Bir yerdə olanda deyirlər ki, sevgili həyatı yaşayırıq. Bəlkə Fədayə xanım məni sevirmiş, bundan xəbərim olmayıb. Fədayə xanım çox şey deyə bilər. Mən onunla sevgili olmamışam. Sevmək? Sevmək ancaq qızla oğlan arasında, qız uşağı olanda olur. O mənə qədər bir neçə insanla tanış olub. Mən onla necə sevgi yaşaya bilərəm ki?”.
Qeyd edək ki, T.Şahmalıoğlu illər öncə ATV-nin "Düz üzünə” verilişində Fədayə Laçınla sevgili münasibətində olduğunu etiraf etmişdi.
Fədayə Laçın bu söz-söhbətlərin yenidən gündəmə gəlməsinə maraqlı tərəfdimi? Tacir qeyd edir ki, ailəsi var. Bu məsələni gündəmə gətirməyin nə mənası var? Tacirin bu açıqlamasına Fədayə Laçın "Şərq”də sərt cavab verdi:
"Tacir bununla nə deməyə çalışır? Bu söz-söhbəti mən yenidən gündəmə gətirmişəm? Onu narahat edirsə, danışmasın. O, verilişlərdə bu barədə danışır. Hansı ki, biz onunla bu gün də məclislərdə görüşəndə, restorana xaş yeməyə gedəndə normal ünsiyyətimiz var. Biz süfrə arxasında hamıyla oturub çörək yeyirik. Onda niyə mənə heç nə demir? Çəkilişlərə bir yerdə gedirik. Sonra nə baş verir, onu bilmirəm? Bilmirəm gündəmə gəlmək istəyir bu söz-söhbətlə? Ayıbdı.
İkincisi deyir ki, ailəsi var, belə söz-söhbət ona yaraşmır. Bu sözü mənə atır? O, əgər hörmətli, sözü keçən oğlan olsa, jurnalistə elə bir tonda deyər ki, nə şiş yanar, nə kabab. Məsələn, "bu barədə bir də mənə sual vermə”. Necə ki, mən deyirəm ki, "mənə bu barədə sual verməyin”. İndi qoçağın biri çıxıb onu danışdırıb, o da danışıb. Tacir saf adamdı. Mənim ona yazığım gəlir. Bədbəxt insandı. Elə belə də yazın. Nə deyirəm yazın. Saflığından istifadə edirlər. Qaldı aramızda olan münasibəti danmağına, biz müğənnilərin həyatı hamıya bəllidi. Yalan danışmağın nə mənası var. Göz önündə olmuşuq. Sevgili olmuşuq. Niyə danım ki? Mən deyim ki yox, biz onunla bacı-qardaş olmuşuq, ayıb olar. Bilən bilirdi. İndi yalan necə danışım? O vaxt özü bar-bar bığırırdı ki, sevirəm. Deyirdim a balam, belə reklam eləmə. Deyirdi ki, yox, sevirəm. Mən ondan küsən kimi "Xarı bülbül” restoranında yıxılırdı güllərin üstünə, ağlayırdı, oxumurdu.
Mənə toxunan odur ki, insan sevirsə, buna görə utanmaz. Mən ona özümü qız uşağı kimi təqdim etmişdim ki? Başa düşmürəm. Mən onunla münasibətim olanda oğlum var idi, bunu bilmirdi ki? Birdəki ancaq qız uşağını sevmək olar ki? Sevgi günah deyil ki. Allahın verdiyi hissdi. Sevgi nə qız uşağına, nə varlıya, nə kasıba, nə də tərbiyəsiz qadın olmağa baxır. Pozğun qadını da sevmək olur, dilənçiyə də aşiq olmaq olar. Sevmisən, bunu da etiraf etmək üçün cəsarət lazımdı. Mən də sevmişəm. Burda nə var ki? Mən cansız əşya deyiləm ki, hisslərim olub. Mən sevgi nədi bilmirəm? Qısqanırdı da, qadağaları olurdu da. İndi illər ötüb, hərə öz işində, gücündədi. Amma demə ki, aramızda heç nə olmayıb. Bu yalandı. Bizi görənlər, tanıyanlar olub. Mən səninlə münasibət yaşamışam. Onu necə dana bilərsən? Sevgini danmaq kişilik deyil”.
Tahirə
