Ekspert: Fiziki maneələr uşaqların və yeniyetmələrin pəncərədən yıxılma riskini əhəmiyyətli dərəcədə azalda bilər
Müasir urbanizasiya şəraitində çoxmərtəbəli binalarda yaşayan əhali, xüsusilə də ailələr üçün yaşayış mühitində təhlükəsizliyin təmin olunması mühüm əhəmiyyət kəsb edir. Azyaşlılar və yeniyetmələr bu mühitdə daha həssas risk qrupunu təşkil edir. Statistik göstəricilər göstərir ki, pəncərədən yıxılma halları uşaq ölümləri və ağır xəsarətlərin səbəbləri arasında yer alır.
Oxşar hadısələrdən biri dünən Bakı şəhərində qeydə alınıb. Belə ki, 17 yaşlı M.Z qız yaşadığı binanın 14-cü mərtəbəsindən yıxılıb. Kliniki Tibbi Mərkəzə yerləşdirilən yeniyetmənin vəziyyəti ağır qiymətləndirilir. Bu kimi hadisələrin qarşısının alınması üçün təhlükəsizlik tədbirlərinin vaxtında və sistemli şəkildə həyata keçirilməsi vacibdir.
Əməyin mühafizəsi və texniki təhlükəsizlik məsələləri üzrə ekspert Orxan Musayev "Sherg.az"a bildirib ki, binalarda təhlükəsizliyin təmin olunması məqsədilə xüsusilə azyaşlılar və yeniyetmələr üçün risklərin minimuma endirilməsinə yönəlik preventiv tədbirlərin həyata keçirilməsi zəruridir:
“Bu çərçivədə, pəncərələrdə mütləq şəkildə təhlükəsizlik məqsədli metal barmaqlıqların quraşdırılması tövsiyə olunur. Belə fiziki maneələr uşaqların və yeniyetmələrin pəncərədən yıxılma riskini əhəmiyyətli dərəcədə azalda bilər. Əgər texniki və ya memarlıq baxımından barmaqlıqların quraşdırılması mümkün deyilsə, alternativ olaraq pəncərələrin tam açılmasının qarşısını alan xüsusi kilid mexanizmlərinin tətbiqi məqsədəuyğundur. Bu mexanizmlər təhlükəsizliyin təminində effektiv mühəndis həlləri hesab olunur. Fiziki müdafiə vasitələri ilə yanaşı, psixososial yanaşmalar da önəmlidir. Bu baxımdan, valideynlər tərəfindən uşaqlara və yeniyetmələrə istiqamətlənmiş sistemli maarifləndirmə və təhlükə haqqında məlumatlandırma tədbirləri həyata keçirilməlidir. Azyaşlılara pəncərədən yıxılma hallarının potensial olaraq həyati təhlükə daşıdığı və ya ciddi bədən xəsarətləri ilə nəticələnə biləcəyi izah edilməlidir. Bu yanaşma həm fərdi, həm də ictimai təhlükəsizlik səviyyəsinin artırılmasına xidmət edir”.
