"Əşarq” qəzeti məlumat yayıb ki, HƏMAS Qəzzada atəşkəs razılaşmasının birinci mərhələsi çərçivəsində İsrail siyahısında olan 34 girovu azad etməyə razılaşıb. İsrailin təqdim etdiyi və HƏMAS-ın təsdiqlədiyi siyahı danışıqların son raundunda razılaşdırılmış meyarlara cavab verib. Siyahıda Qəzzada saxlanılan qadınlar, uşaqlar və xəstələrin adları var.
“HƏMAS bu girovları azad etməyə razılaşıb, lakin onların sağ olub-olmadığını dəqiq müəyyən etmək təxminən bir həftə çəkəcək”, - deyə mənbədə qeyd olunub.
Sözügedən məsələni "Sherg.az"a şərh edən Orta Doğu Araşdırmalar Mərkəzinin sədri, politoloq Sədrəddin Soltan bildirib ki, bir ildən çox davam edən münaqişənin əsas məsələlərindən biri əsirlərin azad edilməsidir:
"HƏMAS, dəfələrlə"hamının hamıya" prinsipi ilə girov və əsirlərin dəyişdirilməsini təklif edib, lakin İsrail bu təklifləri qəbul etməyib. Münaqişənin uzanmasının əsas səbəblərindən biri də məhz budur. Lakin əsirlərin dəyişdirilməsi məsələsi İsraildə müəyyən siyasi narazılıqlara və müzakirələrə səbəb olduğu üçün, HƏMAS və İsrail arasında əsirlərin azad edilməsi ilə bağlı razılaşmaya gəlmək münasibətlərə müsbət təsir göstərə bilər. Bu razılaşmanın, HƏMAS-İsrail münasibətlərinə olduğu kimi, Fələstin-İsrail əlaqələrinə də müsbət təsir etməsi mümkündür. Sözügedən perspektivdə, HƏMAS-ın etibar qazanması və özünü müstəqil bir təşkilat kimi təsdiq etməsi ehtimalı da artır. Əsirlərin dəyişdirilməsi tərəflərin bir-birinə olan etimadını artırar və atəşkəsin yaranmasına zəmin yaradar. Əgər atəşkəslə bağlı razılaşmaya gəlinərsə, bu, İsrail-Fələstin münasibətlərində yeni bir dövrün başlanmasına səbəb olar. Yəni yeni dövr bölgədəki sabitliyə, siyasi proseslərə, əməkdaşlığa, sosial məsələlərə, qaçqınların qayıdışına və ümumi inkişaf proseslərinə müsbət təsir göstərə bilər".
