"Delimitasiya və demarkasiya məsələləri isə uzun prosesdir, illərlə çəkə bilər"
"Hər hansı vasitəçi olmadan ermənilərlə daha tez dil tapmaq mümkündür. Münaqişənin uzun müddət ərzində həll olunmamasının kökündə məhz Minsk qrupunun əsas həmsədr ölkələri - ABŞ, Fransa və Rusiyanın "vasitəçilik" missiyaları dururdu".
Bu sözləri "Sherg.az"a açıqlamasında millət vəkili Nəsib Məhəməliyev deyib.
Deputat bildirib ki, heç kimə sirr deyil ki, bu üç ölkənin hər birinin regionda öz siyasi, iqtisadi maraqları var:
"Onlar problemin həllindən daha çox öz korparativ maraqlarından çıxış edirdilər. Nəticədə, Azərbaycan məcburiyyət qarşısında qalaraq, müharibə yolu ilə münaqişəni həll etməli oldu. Əfsuslar olsun ki, müharibədən üç il keçməsinə baxmayaraq, hələ də sülh müqaviləsi imzalanmayıb. Bunun da əsas səbəbi, yenə də həmin "vasitəçilər"dir. Fransa prezidenti E.Makronun kobud müdaxiləsindən sonra sülh danışıqları dalana dirəndi. Hazırki vəziyyət elədir ki, Qərbin qərəzli yanaşması bizi, Rusiyanın mövqeyi isə aralarında yaranmış gərginliyə görə Ermənistanı qane etmir. Belə olan halda ən optimal variant təkbətək görüşdür. Danışıqların, sərhədin hansı hissəsində keçirilməsinin fərqi yoxdur. Ümumiyyətlə, delimitasiya proseslərinin qaydası belədir ki, növbəli şəkildə hər iki ölkənin ərazisində keçirilməlidir. Bir dəfə bizdə, bir dəfə də Ermənistanda. Qazax da ola bilər, Laçın da".
Parlament üzvünün sözlərinə görə, anklavların qaytarılması məsələsi 10 noyabr üçtərəfli bəyannaməsində və sonra əldə olunmuş razılaşmalarda əksini tapmış məsələdir:
"Delimitasiya və demarkasiya məsələləri isə uzun prosesdir. Hətta illərlə çəkə bilər. Əvvəlcə tərəflər arasında mübahisə doğurmayan ərazilər dəqiqləşdirilir və protokollaşdırılır. Sonra mübahisəli bölgələr üzrə müzakirələr aparılır. Sərhədlərin dəqiqləşdirilməməsi sülh müqaviləsinin imzalanması üçün maneçilik törətməməlidir. Əsas odur ki, iki dövlət arasında sülh müqaviləsi imzalanmalı, gərginlik aradan qalxmalı, kommunikasiyalar açılmalı, regionun yenidən hərbiləşdirilməsinin, kənar qüvvələrin daxil olmasının qarşısı alınmalıdır. Qalan digər məsələlər iki dövlət arasında, hər hansı vasitəçilər olmadan, danışıqlar yolu ilə həllini tapmalıdır. Əgər, Ermənistan özündə siyasi iradə tapa bilsə, İrəvanla-Bakı arasında birbaşa təmaslar effektiv ola bilər".
