Məktəblərdə dərs yükünün həddindən artıq çox olması və dərslərin məzmun baxımından ağır, bəzi hallarda isə ali təhsil səviyyəsinə yaxın tədris olunması hazırda təhsil sistemində ən çox tənqid edilən məsələlərdəndir.
Bu sözləri Axar.az-a açıqlamasında təhsil eksperti Kamran Əsədov deyib.
Məsələyə münasibət bildirən təhsil eksperti Elşən Qafarov Sherg.az-a açıqlamasında bildirib ki, təhsil səviyyələri üzrə həftəlik dərs və dəstəklənən məşğələ saatlarının ümumi miqdarı ümumtəhsil dövlət standartlarının 11-ci maddəsində öz əksini tapıb:
“Hazırkı vəziyyətdə dərs yükünün çox olması və yaxud da az olmasına görə Kamran müəllim, digər mütəxəssislərlə bərabər bununla bağlı vaxtaşırı olaraq təkliflər veririk. Amma məsələ odur ki, bu proses qanunvericiliklə tənzimlənir. Nazirlər Kabinetinin 29 sentyabr 2020-ci il tarixli 361 saylı qərarı ilə təsdiq olunan Ümumtəhsil dövlət standartlarında göstərilib. Eyni zamanda, dərs saatlarının ümumi miqdarı ilə bağlı Nazirlər Kabinetinin başqa bir qərarı da var. 3 avqust 2012-ci il tarixli şagird yerləri və sanitar gigiyenik normalar haqqında normativlər bölməsində orada da qeyd olunur. Yəni hal hazırkı siniflər üzrə tədris planında olan dərs yükü qanuna zidd deyil. Amma mütəxəssis olaraq mən də elə fikirləşirəm ki, tədris prosesində uşaqların həddən artıq çox yüklənməsi təhsilin keyfiyyətinə mənfi təsir göstərir. Arzu edərdik ki, tədris planında dərsdənkənar məşğələlərin təyinatı üzrə keçirilməsinə diqqət edilsin, dərsliklər daha uyğun və metodika əlçatan olsun. Mən düşünürəm ki, Azərbaycan müəlliminin peşəkarlığı yüksək səviyyədə olarsa və müasir təlim metodlarından, təlim strategiyalarından səmərəli şəkildə istifadə etməyi bacararsa, dərsliklər əlçatan olarsa, bu gün dərs saatlarının çox olmasının ağırlığını şagirdlər hiss etməz. Bu gün dərs saatlarının ağırlığını harada hiss edirik? Müəllim peşəkarlığı lazım olan səviyyədə deyil, dərsliklər bərbad gündədir, metodologiyalar yox səviyyəsindədir. Olan metodologiyaları isə müəllimlər tətbiq edə bilmirlər. Nəticə etibarilə görürük ki, bu gün tədris planında olan saatlar şagirdlərə ağırlıq edir. Həmçinin kölgə təhsili olan reptitorluq və reptitorların verdiyi tapşırıqlar problemlər yaradır. Azərbaycan təhsilində ən birinci problem müəllim peşəkarlığıdır. İkinci dərsliklərdir metodologiyalardır. Daha sonra tədris planındakı olan saatların miqdarıdır. Biz daha böyük problemləri həll etmədən nisbətən kiçik problemlərin həlli ümumi keyfiyyətə müsbət təsir göstərməyəcək”.
