"Bu gün bizim üçün çox əlamətdar gündür. Çünki bu gün Dini Qurumlarla İş üzrə Dövlət Komitəsinin yaranmasının 24-cü ildönümünü qeyd edirik. Eyni zamanda Azərbaycan İlahiyyat İnstitutunun 4-cü məzuniyyət gününü keçiririk. Azərbaycan İlahiyyat İnstitutu 2018-ci ildə Prezident İlham Əliyevin sərəncamı ilə yaradılıb. Bu, Azərbaycanda din sahəsində ali təhsil verən yeganə dövlət müəssisəsidir. Məzunlarımız ölkəmizdə müxtəlif dini ocaqlarda və elmi müəssisələrdə fəaliyyət göstərirlər. Sevindirici haldır ki, Azərbaycan İlahiyyat İnstitutunun məzunları artıq peşəkar dini kadrlar kimi ölkəmizin müxtəlif bölgələrində öz fəaliyyətlərini davam etdirirlər".
Sherg.az xəbər verir ki, bu sözləri jurnalistlərə müsahibəsində Azərbaycan İlahiyyat İnstitutunun rektoru Aqil Şirinov institutun məzuniyyət tədbirində söyləyib:
“Bu illər ərzində institutun beynəlxalq əlaqələri də inkişaf edib. Hazırda 33 xarici ali təhsil müəssisəsi ilə əməkdaşlıq müqavilələrimiz var və bu çərçivədə müəllim-tələbə mübadiləsi həyata keçirilir. Azərbaycan İlahiyyat İnstitutunun beynəlxalq səviyyəli jurnalı da mövcuddur. Yaxın zamanlarda bu jurnalı beynəlxalq indekslərdən keçirərək dərgi halında nəşr etdirməyi qarşıya məqsəd qoymuşuq. Eləcə də institutun müəllimləri bu istiqamətdə fəal iştirak edirlər. Əminliklə demək olar ki, Azərbaycan İlahiyyat İnstitutu ölkəmiz və xalqımız üçün din sahəsində peşəkar kadrlar hazırlayıb və gələcəkdə də bu istiqamətdə fəaliyyətini davam etdirəcək. Bu gün biz Dini Qurumlarla İş üzrə Dövlət Komitəsinin nəzdində fəaliyyət göstərir, din sahəsində peşəkar kadrlar hazırlayırıq".
Rektor bu il 48 bakalavr, 8 magistratura səviyyəsində tələbənin məzun olduğunu, eləcə də doktorantura səviyyəsinin mövcudluğunu və burada Ali Attestasiya Komissiyasının təşkil etdiyi müdafiə şurasının fəaliyyət göstərdiyini bildirib.
