ABŞ-nin yeni seçilmiş prezidenti Donald Tramp Türkiyənin dövlət başçısı Rəcəb Tayyib Ərdoğanla dost olduğunu deyib.
O, bu barədə keçirdiyi mətbuat konfransında bildirib.
Tramp Ərdoğana hörmət etdiyini vurğulayıb: "Onun da mənə hörmət etdiyini düşünürəm".
Respublikaçıların başçısı Ərdoğanın çox güclü və ağıllı lider olduğunu diqqətə çatdırıb.
Qeyd edək ki, bundan əvvəl Türkiyə Prezidenti Rəcəb Tayyib Ərdoğan X-də yazdığı mesajda Donald Trampı seçkidə əldə etdiyi qələbə münasibətilə təbrik edərək, onu “dost” adlandırıb. Təhlilçilər deyir ki, Ərdoğan Trampla yaxın əlaqələrini yenidən qurmağa və iki ölkə arasında münasibətləri xarici işlər nazirləri səviyyəsində saxlayan Prezident Co Baydenlə soyuq münasibətlərini geridə qoymağa çalışacaq.
Siyasi şərhçi Kənan Novruzov "Sherg.az"a bildirib ki, Trampın əvvəlki hakimiyyəti dövründə ABŞ-Türkiyə münasibətləri indikindən nisbətən daha yaxşı idi:
"Donald Tramp və Rəcəb Tayyib Ərdoğan siyasətçi olaraq bir-birlərini yaxşı başa düşürlər. ABŞ-nin yeni seçilmiş Prezidenti öncələr də Türkiyə liderinin ünvanına bu cür xoş fikirlər səsləndirib. Trampın andiçməsindən sonra məhz liderlərin şəxsi münasibətlərinə görə dövlətlərarası əlaqələr qismən tənzimlənəcək. Həmçinin bu, bir sıra istiqamətlərdə özünü göstərəcək. Xüsusilə ABŞ-Türkiyə əməkdaşlığı sayəsində Şərqi Avropadakı müharibə bu il başa çata bilər. Bu prosesdə Ankara və Vaşinqtonun əhəmiyyətli rolu olacaq. Eyni zamanda Yaxın Şərqdəki vəziyyət sabitləşəcək və ABŞ Suriyadan çıxacaq. Həmçinin Cənubi Qafqazda da müəyyən addımlar atılacaq".
Şərhçi vurğulayıb ki, siyasət həm də ticarətdir, gərək nəsə verəsən ki, nəyisə ala biləsən:
"Bu mənada hər iki tərəfin maraqları təmin edilsə, Türkiyə və ABŞ bir-birini yaxşı anlayacaq. Tramp və Ərdoğan münasibətləri tənzimləyərsə, ABŞ-nin Cənubi Qafqazla bağlı destruktiv mövqeyi və siyasi məqsədləri azalar. Ümumiyyətlə səslənən bəyanatlar onu deməyə əsas verir ki, Tramp administrasiyasının dönəmində dünyada ciddi hadisələr baş verəcək. Bu da xeyli dərəcədə Türkiyə ilə ikitərəfli əlaqələrin sayəsində olacaq".
