İran Türkiyənin hərbi əməliyyatlarına qarşı çıxmaq üçün Suriyadakı YPG/PKK qruplaşmasına 1500 kamikadze dron tədarük etməyə razılaşıb. Bu barədə Türkiyənin “Yeni Şəfəq " qəzeti məlumat yayıb. Məlumata görə, İran nümayəndələri ilə terror təşkilatı arasında görüş İraqda baş tutub. PKK-çılar İrandan əvvəlcə 2000 pilotsuz təyyarə tələb ediblər. Lakin İran nümayəndələri yalnız 1500 ədəd təmin edə biləcəklərini deyiblər. Razılaşma əldə olunmasına baxmayaraq, Türkiyənin yaxından izləməsi və Suriyaya hər hansı pilotsuz təyyarənin ötürülməsinə mane olmaq təhlükəsi səbəbindən daşınma gecikdirilib.
Qeyd olunur ki, razılaşmanı əngəlləmək əzmində olan Türkiyənin səyləri İran və YPG/PKK arasında əməkdaşlığı dayandırıb. Əlavə edilib ki, Türkiyənin təzyiqi altında YPG/PKK alternativ strategiyaya - aşkarlanmamaq üçün pilotsuz təyyarələrin ayrı-ayrı hissələrlə daşınması planını həyata keçirmək istəyir. Lakin Türkiyənin sərhəd boyu əməliyyatlarını davam etdirməsi səbəbindən bu strategiyanın uğuru şübhə altında qalır.
Türkiyənin Azərbaycandakı keçmiş hərbi attaşesi, ehtiyatda olan general Yücel Karauz “Sherg.az”a bildirib ki, İran çox təhlükəli işlərlə məşğuldur:
“İran bundan əvvəl də PKK və Suriyada olan PYD/YPG terror quruplaşmalarına hər cür dəstək verib. Ötən günlərdə də İran nümayəndələri İraqda PKK/YPG nümayəndələriylə bir araya gəldilər. Həmin görüşdən sonra İran PKK/YPG-yə texniki və silah yardımı ilə bağlı söz verdi. Bu proses Türkiyəyə qarşı savaş elan etməkdir. İranın Suriyada və daxilində itirdiyi nüfuzunu Türkiyə üzərindən bərpa etməyə çalışması rəsmi Tehranın antiTürkiyə siyasətini davam etdirməsi deməkdir. Bu isə nəticə etibarilə İranın özünə zərər verəcək ortam yaradır. Türkiyə İranın etdiklərinə qarşı lazım olan addımları atacaq. Rəsmi Tehran Ankaranın düşmənliyini deyil, dostluğunu düşünüb buna uyğun siyasət aparmalıdır”.
