Azərbaycanda 21 yaşına çatmış vətəndaşların mülki odlu silah əldə etmək hüququ olacaq.
APA-nın xəbərinə görə, bu, Milli Məclisin bu gün keçirilən iclasında müzakirəyə çıxarılan "Xidməti və mülki silah haqqında" qanuna təklif olunan dəyişiklikdə əksini tapıb.
Qüvvədə olan qanuna əsasən, qanunun tələblərinə müvafiq olaraq Azərbaycan Respublikasında on səkkiz yaşına çatmış Azərbaycan Respublikası vətəndaşlarının (mülki silah əldə etmək hüququ var. Layihəyə əsasən, Azərbaycan Respublikasında on səkkiz yaşına çatmış Azərbaycan Respublikası vətəndaşlarının odlu silah istisna olmaqla, mülki silah əldə etmək hüququ olacaq. Azərbaycan Respublikasında iyirmi bir yaşına çatmış vətəndaşlara isə mülki odlu silah əldə etmək hüququ verilir.
Qanun layihəsi səsverməyə çıxarılaraq birinci oxunuşda qəbul edilib.
Təhlükəsizlik məsələləri üzrə ekspert Rəşad Rza "Sherg.az"a deyib ki, 18 yaşına çatmış hər bir Azərbaycan vətəndaşı silah əldə edə bilər:
“Burada sadəcə müəyyən şərtlər var. Sağlamlığı yerində olan, cinayət məsuliyyətinə cəlb olunmamış insanlar silah almaq hüququ qazana bilərlər. Hətta indi silah əldə etmək daha da asanlaşdırılıb. Onlayn formada müraciət olunacaq, lazım olan sənədlər yüklənəcək, sonra isə Daxili İşlər Nazirliyi tərəfindən baxılacaq. Əgər, həmin şəxsə silah verilməsinə görə bir qadağa və əngəl yoxdursa, mülki silah ala bilər. Ümumiyyətlə silahlar iki növə bölünür. Birincisi, mülki, ikincisi isə ov silahıdır. Bəzi adamlar müəyyən yollarla arayış alaraq əldə edirdi. İndi isə həmin şəxslərin qarşısı alınacaq”.
