Bizim mövqeyimiz ondan ibarətdir ki, əgər hər bir ölkə diqqətini, sadəcə, öz gündəminə yönəltsə, başqa ölkənin işlərinə müdaxilə etməyə çalışmasa, münaqişələr, narazılıqlar, müharibələr olmaz. Bu fikirləri Prezident İlham Əliyev Çinin CGTN telekanalına müsahibəsində səsləndirib.
Azərbaycan Prezidenti deyib ki, bütün dünyada hələ də qeyri-sabit vəziyyətin olmasının və qan tökülməsinin yeganə səbəbi ondan ibarətdir ki, imperialist keçmişi olan ölkələr, sadəcə olaraq, müdaxilə etməyə, dominantlıq etməyə, diktə etməyə davam etmək istəyir və bu, təbii olaraq, müqavimətə gətirib çıxarır.
Politoloq Sultan Zahidov “Sherg.az”a bildirib ki, prezidentin diqqətə çatdırmaq istədiyi məsələ hazırda uzun əsirlər boyunca dünyanı cənginə alan imperializm, kolonializm və dövlətlərin daxili işlərinə qarışmaq siyasətinin davam etdiyini göstərməkdən ibarətdir:
“Bu gün özlərini demokratiyanın, insan haqlarının, sabitliyinin carçısı kimi qələmə verən dövlətlər mövcuddur. Həmin dövlətlər tərəfindən qeyri-adekvat siyasətin, postkolonializmin davam etdirilməsinin şahidi oluruq. Fransanın Afrika, Yaxın Şərq, Qafqazdakı mövqeyi, Rusiyanın isə Müstəqil Dövlətlər Birliyinə yönəlik siyasəti “parçala və hökm sür” ritorikasına əsaslanır. Eyni zamanda digər böyük güclərin də dedikləri və əməlləri arasında kəskin fərqlərin olduğunu görürük. Bu dövlətlər bir tərəfdən sabit dünya düzənindən, digər tərəfdən isə ölkələrin daxili işlərinə qarışaraq öz kirli ambisiyalarını həyata keçirirlər. Fransa Cənubi Qafqazda Ermənistanın "qara qaşına, qara gözünə vurulmayıb". Rusiya da Ukraynada sabitlik niyyəti qətiyyən güdmür. Bunların hamısının arxasında geosiyası maraqlar, təbii resurslar və digər məkrli niyyətlər dayanır. Əgər özünü böyük güc sayan dövlətlər hegemonluq niyyətlərini qırağa atıb sabitlik və inkişaf üçün əllərini danış altına qoysalar dünya bu gün daha gözəl olardı və müharibələr belə intensiv xarakter daşımazdı. Yaxın və Orta Şərqi silkələyən İsrail-Fələstin münaqişəsi bu günə qədər niyə həll olunmayıb? Bunun arxasında regional və böyük güclərin geosiyasi ambisiyaları dayanır. İmperialist keçmişi olan ölkələrin daha aktiv fəaliyyəti dünyanın sabitliyinə və təhlükəsizliyinə mənfi təsir göstərir”.
